మీసం మెలేసిన రఘురామకృష్ణరాజు.. గెలుపు ఆయనదేనా.?

వైసీపీ రెబల్ ఎంపీ రఘురామకృష్ణరాజుని గుంటూరు నుంచి సికింద్రాబాద్ తరలించిన విషయం విదితమే. ప్రస్తుతం ఆయన సికింద్రాబాద్ ఆర్మీ ఆసుపత్రిలో వున్నారు. గుంటూరు నుంచి బయల్దేరుతూనే, రఘురామకృష్ణరాజు విజయసంకేతాన్ని మీడియాకి, అభిమానులకీ చూపించారు. అంతేనా, మీసం మెలేశారు కూడా. కాళ్ళకు గాయాలు కాస్త నొప్పిగానే వున్నాయేమో.. పోలీసు సిబ్బందిలో ఒకరి సాయంతో ఆయన కారులోకి ఎక్కారు.. దిగేటప్పుడూ ఆయనకు సిబ్బంది సాయం అందించాల్సి వచ్చింది.

సికింద్రాబాద్ ఆర్మీ ఆసుపత్రికి చేరుకున్న ఆయన, ఇంకా కాళ్ళు నొప్పిగానే వున్నాయనీ, అయితే నొప్పలు తీవ్రత కొంత తగ్గిందని చెప్పారు. ఇక, తెలంగాణ హైకోర్టు నియమించిన జ్యుడీషియల్ అధికారి సమక్షంలో రఘురామకు వైద్య పరీక్షలు ఆర్మీ ఆసుపత్రిలో జరుగుతాయి. అక్కడే ఆయనకు వైద్య చికిత్స కూడా అందుతుంది.

వైద్య పరీక్షలకు అభ్యంతరం లేదనీ, వైద్య చికిత్స మాత్రం సబబు కాదని రాష్ట్ర ప్రభుత్వం వాదనలు వినిపించినా, సుప్రీంకోర్టు.. ఆ వాదనల్ని తిరస్కరించడంతో రఘురామ పాక్షింగా ఈ కేసులో విజయం సాధించినట్లేనన్న చర్చ సర్వత్రా జరుగుతోంది. మరోపక్క, ఈ నెల 21న ఖచ్చితంగా ఆయన బెయిల్ సంపాదిస్తారని కుటుంబ సభ్యులు, సన్నిహితులు చెబుతున్నారు.

అదే గనుక జరిగితే, రఘురామ ఖాతాలో మరో విజయం పడినట్లే. ఇంకోపక్క, ఎంపీగా తన ప్రతిష్టకు భంగం కలిగించేలా ప్రభుత్వం కుట్రపూరితంగా వ్యవహరించిందనే కోణంలో రఘురామ, లోక్ సభ స్పీకర్ వద్ద తన ఆవేదనను వ్యక్తం చేయబోతున్నారట. గతంలో నిమ్మగడ్డ విషయంలో ఎలాగైతే అసెంబ్లీ ప్రివిలేజ్ కమిటీ.. హక్కలు, అధికారాలు.. అంటూ రాష్ట్ర ప్రభుత్వం చెప్పిందో.. అదే కోణంలో ప్రభుత్వానికి రఘురామ ఝలక్ ఇచ్చినా ఆశ్చర్యపోనక్కర్లేదు.

ఇంకోపక్క, హైకోర్టు ఆదేశాలు పాటించకుండా, తనను జైలుకు పంపడంపైనా రఘురామ ఇప్పటికే కోర్టును ఆశ్రయించిన దరిమిలా, ఏపీ సీఐడీ అధికారులూ సమస్యల్లో పడొచ్చని రాజకీయ విశ్లేషకులు అంటున్నారు. ఎవరి వాదన వారిదే. రాజకీయాల్లో ఎప్పుడు ఎలాగైనా జరగొచ్చు. ఏది తప్పు.? ఎవరిది గెలుపు.? అని చెప్పేయడం అంత తేలిక కాదు.