మిషన్‌ కాశ్మీర్‌.. అసలేం జరుగుతోందక్కడ.!

దేశంలో ఇతర రాష్ట్రాల్లాంటిది కాదు, జమ్మూ అండ్‌ కాశ్మీర్‌. అక్కడ ప్రత్యేక చట్టాలున్నాయి. అది స్పెషల్‌ స్టేటస్‌ కలిగిన రాష్ట్రం. అక్కడి పౌరులకి దేశంలోని మిగతా రాష్ట్రాల్లోని పౌరులతో పోల్చితే, విశేషాధికారాలున్నాయన్నది అందరికీ తెల్సిన విషయమే. తీవ్రవాదులు యధేచ్ఛగా సంచరిస్తారక్కడ. పైగా, స్థానికులు వారికి పూర్తి స్థాయిలో మద్దతిస్తారు. పాకిస్తాన్‌ జెండాలు ఎగురుతాయి.. ఐసిస్‌ జెండాలూ రెపరెపలాడతాయి. పాకిస్తాన్‌తో కాశ్మీర్‌ ప్రజలకున్న సంబంధాల గురించి కొత్తగా చెప్పేదేముంది.? కానీ, ఇకపై అలాంటి పరిణామాలు అక్కడ వుండకపోవచ్చేమో.!

నిజానికి, జమ్మూ అండ్‌ కాశ్మీర్‌కి సంబంధించిన ప్రత్యేక అధికారాల్ని రద్దు చేస్తే, అక్కడి సమస్యలన్నీ సద్దుమణుగుతాయన్న వాదన ఎప్పటినుంచో వుంది. తాజా పరిణామాలు జమ్మూ కాశ్మీర్‌లో ఏదో జరుగుతోందన్న అనుమానాలకు కారణమవుతున్నాయి. విదేశీ టూరిస్టులు, స్వదేశీ టూరిస్టులే కాదు.. విద్యార్థులు సైతం, జమ్మూ అండ్‌ కాశ్మీర్‌ నుంచి పంపివేయబడుతున్నారు. 35 వేల మందికి పైగా భద్రతాదళాలు అదనంగా జమ్మూకాశ్మీర్‌కి వెళ్ళాయి కొద్ది రోజుల వ్యవధిలోనే.

పాకిస్తాన్‌ నుంచి ముప్పు పెరుగుతోందనీ, అమర్‌నాథ్‌ యాత్రపై తీవ్రవాదులు ఫోకస్‌ పెట్టారనీ.. ఇలా జమ్మూ కాశ్మీర్‌ గవర్నర్‌ ఏమైనా చెప్పొచ్చుగాక. కానీ, కేంద్రం జమ్మూ కాశ్మీర్‌ విషయంలో ఏదో కీలక నిర్ణయం తీసుకుందనీ, దాన్ని అమలు చేయడంలో భాగంగానే ఇదంతా జరుగుతోందన్న ఆందోళన మాత్రం కాశ్మీరీలలో కలుగుతోంది. నిజానికి కాశ్కీరీలలో ఆందోళన మాటెలా వున్నా, అక్కడి రాజకీయ నాయకులు ఆందోళన ఎక్కువగా కన్పిస్తోంది.

పైగా, పాకిస్తాన్‌ ప్రేరేపిత తీవ్రవాదులకు మద్దతు పలుకుతున్న రాజకీయ నాయకులు ఉలిక్కిపడుతున్నారన్న వాదనలు బలంగా విన్పిస్తుండడం గమనార్హం. ఎన్నో దశాబ్దాలుగా జమ్మూ అండ్‌ కాశ్మీర్‌లో ఉద్రిక్త పరిస్థితులు కొనసాగుతున్నాయి. అయితే, గతంలో ఎన్నడూ లేని విధంగా.. ఇప్పుడక్కడ పరిణామాలు మారుతున్నాయి. తెలుగు రాష్ట్రాలకు చెందిన విద్యార్థులు కూడా అక్కడి నుంచి తిరిగొచ్చేస్తున్నారు. ఇది సర్జికల్‌ స్ట్రైక్‌ లాంటిదా.? పాకిస్తాన్‌తో యుద్ధం చేయబోతున్నామా.? ఇలా సవాలక్ష అనుమానాలు.. మరి, సమాధానం దొరికేదెప్పుడో.!