షాకిచ్చిన కామ్రేడ్‌: నటనకు గుడ్‌ బై చెప్పేస్తాడా.?

రౌడీ హీరో విజయ్‌ దేవరకొండ చాలా పెద్ద బాంబు పేల్చాడు. దాంతో, రౌడీలు ఇప్పుడు తీవ్ర ఆందోళనకు గురవుతున్నారు. తన కొత్త సినిమా ‘డియర్‌ కామ్రేడ్‌’ విడుదలకు ముందు విజయ్‌ దేవరకొండ ‘నటనకు గుడ్‌ బై చెప్పేస్తా’ అంటూ చేసిన వ్యాఖ్యలు అందరికీ పెద్ద షాకే ఇచ్చాయి. అయితే, విజయ్‌ దేవరకొండ నటనకు గుడ్‌ బై చెబుతానన్నది వేరే టోన్‌లో.

అసలు విషయమేంటంటే, రొటీన్‌గా ఒకే తరహా సినిమాలు చేయడమంటే ఇష్టం వుండదట రౌడీ హీరోకి. ఒకవేళ అలా రొటీన్‌ సినిమాలు చేయాల్సి వస్తే, నటనలో కొనసాగలేనన్నది విజయ్‌ అభిప్రాయం. నటన కాకుండా, వేరే పనుల మీద మనసు మళ్ళినా, నటుడిగా కెరీర్‌కి గుడ్‌ బై చెప్పేస్తానని విజయ్‌ కుండబద్దలుగొట్టేశాడు.

గతంలో పవర్‌ స్టార్‌ పవన్‌ కళ్యాణ్‌ నుంచి ఇలాంటి మాటల్ని విన్నాం. రాజకీయాల్లోకి వెళ్ళాక, పవన్‌ సినిమాలకు గుడ్‌ బై చెప్పేసిన విషయం విదితమే. చిరంజీవి కూడా రాజకీయాల్లోకి వెళ్ళాక సినిమాలు చేయలేదు. కానీ, ‘సినిమాల్ని మిస్‌ అవుతున్నా..’ అనే అభిప్రాయంతో వుండేవారు చిరంజీవి. రాజకీయాలకు దూరమయ్యాక, తిరిగి సినిమాల్లోకి చిరంజీవి వచ్చేయడం, వరుసగా సినిమాలు చేస్తుండడం చూస్తున్నాం. పవన్‌ మాత్రం, సినిమాల్లో మళ్ళీ నటించేది లేదని తెగేసి చెప్పేస్తున్నాడు.

మరి, విజయ్‌ దేవరకొండ ఏం చేస్తాడు.? సినిమాల్ని కాదనుకుంటే అతని ప్రయాణం రాజకీయాల వైపు వెళుతుందా.? లేదంటే, బిజినెస్‌మెన్‌గా మారిపోతాడా.? ఇంకేమైనా చేస్తాడా.? ఇలా రకరకాల ప్రశ్నలు ‘రౌడీస్‌’ని (విజయ్‌ అభిమానుల్ని) కన్‌ఫ్యూజ్‌ చేస్తున్నాయి. ఏదిఏమైనా, తన సినిమా ప్రమోషన్‌ కోసం ఇంట్రెస్టింగ్‌ కామెంట్స్‌ చేయడం విజయ్‌ దేవరకొండకి అలవాటే. సో, ‘డియర్‌ కామ్రేడ్‌’ ప్రమోషన్‌లో భాగంగానే ఈ ఇంట్రెస్టింగ్‌ అండ్‌ షాకింగ్‌ డైలాగ్‌ రౌడీ హీరో పేల్చాడనుకోవచ్చు. విజయ్‌, రష్మిక జంటగా నటించిన ‘డియర్‌ కామ్రేడ్‌’ రేపు ప్రేక్షకుల ముందుకొస్తోన్న విషయం విదితమే.