పెళ్లి చూపులు, ఈ నగరానికి ఏమైంది వంటి చిత్రాలతో తనకంటూ డీసెంట్ ఫ్యాన్స్ బేస్ సంపాదించుకున్నాడు తరుణ్ భాస్కర్. తన నుండి ఐదేళ్ల తర్వాత వచ్చిన చిత్రం కీడా కోలా. ప్రోమోల దగ్గరనుండి ఒక భిన్నమైన డ్రామాగా ఈ చిత్రం అనిపించింది. చైతన్య రావు, రాగ్ మయూర్, జీవన్ కుమార్, బ్రహ్మానందం వంటి వారు నటించిన ఈ చిత్రం ఈరోజే ప్రేక్షకుల ముందుకు వచ్చింది. మరి కీడా కోలా ఎలా ఉందో చూద్దామా.
కథ:
కీడా కోలా అనేది రెండు గ్రూపులకు సంబంధించిన కథ. తాత (బ్రహ్మానందం), వాస్తు (చైతన్య రావు), లంచం అలియాస్ కౌశిక్ (రాగ్ మయూర్) మరియు నాయుడు (తరుణ్ భాస్కర్), జీవన్ (జీవన్ కుమార్), సికందర్ (విష్ణు ఓయ్) లకు వాళ్ళ వాళ్ళ కారణాల వల్ల డబ్బు కావాలి.
అయితే జీవితాలు సెటిల్ అయిపోయే డబ్బు కోసం ఈ రెండు గ్రూపులు కలిసి వచ్చి కూల్ డ్రింక్ లో బొద్దింకను ఎందుకు వేయాల్సి వచ్చింది? దీని వల్ల జరిగిన పరిణామాలు ఏంటి?
నటీనటులు:
చైతన్య రావు ఈ చిత్రంలో మెయిన్ లీడ్ చేసినట్లుగా ప్రమోట్ చేసారు కానీ నిజానికి తరుణ్ భాస్కర్ రోల్ మెయిన్ లీడ్ ఈ చిత్రానికి. పెర్ఫార్మన్స్ పరంగా నాయుడు పాత్రలో తరుణ్ చాలా బాగా చేసాడనే చెప్పాలి. తన కామెడీ టైమింగ్ సూపర్బ్. ఇక మిగిలిన అన్ని పాత్రల్లోకి రాగ్ మయూర్, విష్ణు ఓయ్, జీవన్ కుమార్ ల పాత్రలు సూపర్బ్ గా ఎలివేట్ అవుతాయి. ఇక వాస్తు పాత్రలో చైతన్య రావు బాగానే చేసాడు కానీ కెరీర్ ను మార్చే లాంటి పాత్ర అయితే కాదు.
ఇక కామెడీ కింగ్ బ్రహ్మానందం ఈ చిత్రంలో నటిస్తున్నాడు అంటే చాలానే అంచనాలు ఉన్నాయి కానీ తన పాత్ర అంత ప్రాముఖ్యమైంది కాదు దాని చుట్టూ అంత కామెడీ కూడా పుట్టలేదు. ఇక మిగిలిన పాత్రధారులు అంతా తమ తమ పాత్రలకు న్యాయం చేసారు.
సాంకేతిక నిపుణులు:
టెక్నికల్ గా తరుణ్ భాస్కర్ ఈ చిత్రానికి బిగ్గెస్ట్ డ్రాబ్యాక్ అని చెప్పవచ్చు. ఈ చిత్ర కథ చాలా చాలా వీక్. ట్రీట్మెంట్ అదీ కొత్తగా ఉండాలన్న తాపత్రయంలో తరుణ్ భాస్కర్ కథను పూర్తిగా నెగ్లెక్ట్ చేసినట్లు అనిపిస్తుంది. తన స్క్రీన్ ప్లే కూడా టాప్ గా ఏం లేదు. కొన్ని అద్భుతమైన కామెడీ సీన్లు ఈ చిత్రంలో ఉన్నాయి, అలాగే అన్నే బోరింగ్ సీన్లు కూడా ఉన్నాయి. ఇక ఒక సీన్ తర్వాత ఒక సీన్ వచ్చే విషయంలో కూడా నిలకడ లేనట్లుగా అనిపిస్తుంది.
ఇక్కడ తరుణ్ భాస్కర్ టాలెంట్ ను తక్కువ చేయడానికేం లేదు. కానీ ముందు రెండు సినిమాల రేంజ్ లో పూర్తి స్థాయి ఎంటర్టైనర్ ను అందించలేకపోయాడు అన్నది వాస్తవం. ట్రీట్మెంట్ బాగానే ఉన్నా మెయిన్ కథ అస్సలు లేకపోవడంతో మొత్తం నీరుగారిపోయింది.
ఇక తరుణ్ భాస్కర్ సంభాషణలు ఈ చిత్రానికి ప్రధాన ప్లస్ పాయింట్స్ లో ఒకటి. వివేక్ సాగర్ పాటలు కూడా బాగున్నాయి. బ్యాక్ గ్రౌండ్ స్కోర్ అయితే క్రేజీ లెవెల్లో వర్కౌట్ అయింది. సినిమాటోగ్రఫీ వర్క్ కూడా ఫస్ట్ క్లాస్ గా ఉంది. ఉపేంద్ర వర్మ ఎడిటింగ్ కూడా బాగుంది. ఈ చిత్రంలో విఎఫ్ఎక్స్ జస్ట్ ఓకే. నిర్మాణ విలువలు ఓ స్థాయి వరకూ ఉన్నాయి.
ప్లస్ పాయింట్స్:
- తరుణ్ భాస్కర్ పెర్ఫార్మన్స్
- బ్యాక్ గ్రౌండ్ స్కోర్
- సంభాషణలు
- మిగతా నటీనటుల పెరఫార్మన్స్ లు
- సినిమాటోగ్రఫీ
మైనస్ పాయింట్స్:
- కథ లేకపోవడం
- స్క్రీన్ ప్లే
- బ్రహ్మానందంను సరిగ్గా ఉపయోగించుకోకపోవడం
- క్లైమాక్స్
చివరిగా:
మొత్తానికి కీడా కోలా పర్వాలేదనిపించే ఒక క్రైమ్ కామెడీ సినిమా. తరుణ్ భాస్కర్ నటుడిగా రాణించాడు కానీ కథకుడిగా నిరుత్సాహపరిచాడు. పెళ్లి చూపులు, ఈ నగరానికి ఏమైంది స్థాయిలో కీడా కోలా లేదు కానీ మరీ నిరుత్సాహపరిచే సినిమా అయితే కాదు.
తెలుగు బులెటిన్ రేటింగ్: 2.5/5