ఇందులో తప్పొప్పుల పంచాయితీ ఏంటి.? నేను భారతీయుడ్ని.. ఐ యామ్ యాన్ ఇండియన్.! రెండూ ఆత్మగౌరవాన్ని పెంచేవే.! కొత్తగా ఈ ‘భారత్ మాత్రమే’ అన్న ప్రస్తావన ఎందుకు తెరపైకొస్తోంది.
‘భారత్ వర్సెస్ పాక్’ అంటూ ఓ ట్వీటేశాడు మాజీ క్రికెటర్ వీరేందర్ సెహ్వాగ్.! జీ20 సమావేశాల నిమిత్తం, జారీ అయిన ఓ ఆహ్వాన పత్రికలో ‘భారత్’ అని ప్రస్తావించారు.! ఇలా, బోల్డంత తతంగం నడుస్తోంది.
ఇండియా పేరుని, భారత్‌గా మార్చేందుకు కేంద్రం చర్యలు తీసుకుంటోందనీ, ఏ క్షణమైనా ఈ నిర్ణయం అమల్లోకి వస్తుందనీ పెద్దయెత్తున ప్రచారం జరుగుతోంది.. అటు సోషల్ మీడియాలో, ఇటు మెయిన్ స్ట్రీమ్ మీడియాలో. ఇంతకీ, ఇండియా అనే పేరు కాలగర్భంలో కలిసిపోతుందా.? భారత్ మాత్రమే వుంటుందా.?
రాజ్యాంగంలో కూడా ఇండియా, భారత్.. అనే రెండు పేర్లూ ప్రస్తావించబడ్డాయి. సో, పేరు మార్చడం అంత తేలిక కాదు.! సింధు నాగరికత.. ఆ కోణంలో ‘సింధు’ నది.. అలా ఆ పేరు కాస్తా, ‘ఇంది’, ‘హింది’, ‘ఇండి’, ‘ఇండియా’గా మారిందని చెబుతుంటారు. ‘ఇండియా’ అన్నది బ్రిటిష్ వారి పైత్యమన్నది బహిరంగ రహస్యం.
ఈ విషయాన్ని పలు సందర్భాల్లో సినీ నటుడు, జనసేన అధినేత పవన్ కళ్యాణ్ ప్రస్తావించారు. చాలామంది రాజకీయ ప్రముఖులూ ప్రస్తావించారు. చరిత్ర కూడా ఇదే చెబుతోంది. అయితేనేం, మనం భారతీయులం.. మన ఐడెంటిటీ ఇండియన్స్.!
మేడ్ ఇన్ ఇండియా అంటున్నాం.. మేడ్ ఇన్ భారత్.. అనడమూ తప్పు కాదు.. కొత్తా కాదు.! అసలిక్కడ తప్పొప్పుల పంచాయితీకి ఆస్కారమే లేదు. ఎన్డీయే కూటమి.. అలాగే ఇండియా కూటమి.. ఇక్కడొస్తోంది పంచాయితీ.!
ఇండియా కూటమి పేరుతో, కాంగ్రెస్ నేతృత్వంలోని విపక్షాల కూటమి కొత్త రాజకీయ రచ్చకు తెరలేపడంతో, ఇప్పుడీ ‘భారత్’ అన్న ప్రస్తావన షురూ అయ్యిందనుకోవాలి. రాజకీయం కోసం, రాజకీయ పార్టీలు కొట్టుకు ఛస్తే తప్పేం లేదు. కానీ, ఇలా పేర్లతో రాజకీయం చేయాలనుకుంటే మాత్రం.. అది అత్యంత హేయం.!