ఏ చిత్రానికైనా ఆ మూవీ నిర్మాతే బాక్సాఫీస్ వసూళ్ళ వ్యవహారాలు చూసుకుంటారు. ఎందుకంటే, ఏ సినిమాకి ఎంత ఖర్చు పెట్టారో.. ఎంత వసూళ్ళు జరిగాయో.. ఆయనే కదా తెలుసుకోవాల్సింది. తద్వారా తదుపరి సినిమాకి ఎంత ఖర్చు చేయాలన్నదానిపై ఓ అవగాహన వుంటుంది.
సినీ అభిమానులకి, ఈ వసూళ్ళ లెక్కల గురించిన ఆసక్తి ఎక్కువ. అలా బాక్సాఫీస్ ట్రాకింగ్.. అనే ఓ ప్రస్తావన షురూ అయ్యింది. వెబ్ సైట్లు కావొచ్చు, మెయిన్ స్ట్రీమ్ మీడియా కావొచ్చు.. యూ ట్యూబ్ ఛానళ్ళు కావొచ్చు.. వసూళ్ళ లెక్కల గురించి ప్రస్తావిస్తుంటాయి.
రీడర్‌షిప్ పెంచుకోవడం.. వీక్షకుల్ని పెంచుకోవడం.. ఈ క్రమంలోనే ఈ వసూళ్ళ లెక్కల గురించిన హంగామా.! ఈ వసూళ్ళ లెక్కల్లో నిజమెంత.? అంటే, నేతి బీరకాయలో నెయ్యి చందమే.!
వంద కోట్లు ఖర్చు చేశాం.. అని నిర్మాత చెబితే అది పబ్లిసిటీ స్టంట్. వంద కోట్లు వసూలయ్యింది.. అంటే, అది కూడా జస్ట్ పబ్లిసిటీ స్టంట్. ఇది అందరికీ తెలిసిన విషయమే. ప్రభుత్వాల దగ్గర అసలు సిసలు లెక్కలుంటాయ్.. ఎందుకంటే, సంబంధిత ఖర్చుల్ని నిర్మాతలు పన్నులు కట్టే సమయంలో వెల్లడిస్తుంటారు గనుక.
అయినా, ఏనాడూ ప్రభుత్వాలు ఈ వసూళ్ళ గురించి మాట్లాడవు. వాస్తవాలు ప్రభుత్వాలకు తెలుసు కాబట్టి. అనుమానమొస్తే మాత్రం, ఐటీ శాఖ నుంచి సోదాలు షురూ అవుతాయి. ఆ తర్వాత ఏం జరుగుతుందన్నది మళ్ళీ వేరే చర్చ.!
ఎప్పుడూ ప్రభుత్వాల్లో వున్న వ్యక్తులు సినిమాల కలెక్షన్ల గురించి మాట్లాడరు. కానీ, ఆంధ్రప్రదేశ్ రాష్ట్రంలో మంత్రులు సినిమాల కలెక్షన్ల గురించి మాట్లాడతారు. అంతే కాదు, సినిమాలకు రివ్యూలూ ఇస్తుంటారు. సినిమా హిట్టు, ఫ్లాపు, డిజాస్టర్ అని కూడా తేల్చేస్తుంటారు.
తెలుగు సినీ పరిశ్రమ హైద్రాబాద్‌లో సెటిలైంది. ఆ కోణంలో చూస్తే, ఆంధ్రప్రదేశ్ రాష్ట్రంలో హిందీ సినిమాలెలాగో.. తెలుగు సినిమాలూ అంతే. హిందీ సినిమాల వసూళ్ళ గురించి ఏపీ మంత్రులు మాట్లాడలేరు కదా.! కానీ, తెలుగు సినిమాల విషయంలో అనవసర జోక్యం చేసుకుంటుంటారు.
పైగా.. వార్నింగులొకటి.! ‘ఇకపై సినిమాలు తీసేటప్పుడు జాగ్రత్త..’ అంటూ నేరుగా రచయిత, దర్శకుడు త్రివిక్రమ్ శ్రీనివాస్ పేరు తెచ్చి మరీ మంత్రి అంబటి రాంబాబు వార్నింగు లాంటి విజ్ఞప్తి చేసేశారు. ఇదెక్కడి పంచాయితీ.? స్వర్గీయ ఎన్టీయార్ మీదనే వెటకారంగా సినిమాలు తీసిన సందర్భాలున్నాయి.
చంద్రబాబు మీద.. పవన్ కళ్యాణ్ మీదా వెటకారాలతో సినిమాలు తీయట్లేదా.? అయినా, ‘బ్రో’ సినిమాలోని ‘శ్యాంబాబు’ అనే పాత్ర మీద మంత్రి అంబటికి ఎందుకంత అక్కసు.? ఆ పాత్రని ఆయన తనకు తాను అన్వయించుకోవడమేంటి.? గతంలో పేర్ని నాని, అనిల్ కుమార్ యాదవ్.. మంత్రులుగా వున్న సమయంలో ఇలాగే, సినిమాల సక్సెస్, ఫెయిల్యూర్, వసూళ్ళ గురించి మాట్లాడి పదవులు కోల్పోయారు.
మంత్రి అంబటి రాంబాబు సంగతి ఏమవుతుందో మరి.! అయినా, మంత్రిగారి తాటాకు చప్పుళ్ళక భయపడేదెవరు.? ఆయనేమన్నా సినిమా కలెక్షన్ల శాఖ మంత్రి కాదు కదా.!