మెగా ప్రిన్సెస్.! గోల్డెన్ స్పూన్‌తో పుట్టినా ముళ్ళబాటలో వికసించిన నిహారిక.!

సాధారణంగా స్టార్ హీరోల ఇంట్లోంచి అమ్మాయిలు వెండితెరపై హీరోయిన్లుగా వెలిగిపోవడమంటే అదేమంత ఆషామాషీ వ్యవహారం కాదు. బాలీవుడ్‌లో ఇది సర్వసాధారణమే. తమిళ సినీ పరిశ్రమలోనూ పెద్దగా సమస్యల్లేవ్. తెలుగు సినీ పరిశ్రమకు వచ్చేసరికి మాత్రం వ్యవహారాలు తేడాగా వుంటాయ్.

మెగా ప్రిన్సెస్.. కొణిదెల నిహారిక.! తొలుత బుల్లితెరపై సత్తా చాటింది. ఆ తర్వాత వెండితెరపై తనదైన ప్రత్యేకతను చాటుకునేందుకు ప్రయత్నించింది. ఈ క్రమంలో నిహారిక ఎదుర్కొన్న సమస్యలు అన్నీ ఇన్నీ కావు. గోల్డెన్ స్పూన్.. అన్న పేరుగానీ, సినీ రంగంలో ఆమె ప్రయాణం.. నల్లేరు మీద నడక కాదు.! అడుగడుగునా ముళ్ళదారి ఎదురయ్యిందామెకి.!

ఓ ప్రముఖ యంగ్ హీరోతో ఎఫైర్.. అంటూ గాసిప్స్ పుట్టుకొచ్చాయ్.. పొగరు.. అంటూ అడ్డగోలు కథనాలు ప్రచారంలోకి వచ్చాయి. మెగా కాంపౌండ్ నుంచి వచ్చే హీరోలనే వదలని ఓ సెక్షన్ మీడియా.. నిహారికని వదులుతుందా.?

కుల జాడ్యం మొత్తాన్నీ నిహారిక మీద చూపించింది సదరు మీడియా. మీడియాలో రెండు ప్రధాన ‘వర్గాలు’ నిహారికను టార్గెట్‌గా చేసుకుని నడిపించిన యాగీ అంతా ఇంతా కాదు. కానీ, నిహారిక తానేంటో నిరూపించుకుంది. నటిగా మంచి మార్కులేయించుకుంది. కానీ, హీరోయిన్‌గా నిలదొక్కుకోవాలన్న కల మాత్రం నెరవేర్చుకోలేకపోయింది.

అత్యంత దురదృష్టకరమైన విషయమేంటంటే, పెళ్ళి చేసుకుని.. నటనకు దాదాపు గుడ్ బై చెప్పినా కూడా నిహారిక, మీడియాలోని ఆ రెండు వర్గాల నుంచి తప్పించుకోలేకపోయింది. నిహారిక సంసారంలో నిప్పులు పోయాలని ఆ రెండు మీడియా రక్కసులూ ఆమె వెంట పడ్డాయి. తప్పుడు ప్రచారాలు చేశాయ్.!

మీడియా వేధింపుల సంగతి పక్కన పెడితే, నిహారిక ఏనాడూ స్థైర్యం కోల్పోలేదు. నాన్న కూచి అయినాగానీ, ధైర్యంగా నిలబడింది. ఓటీటీ వేదికగా అలాగే యూ ట్యూబ్ వేదికగా నిహారిక నిర్మాణ కార్యకలాపాలు కొనసాగిస్తూనే వుంది. పింక్ ఎలిఫెంట్ పిక్చర్స్ బ్యానర్ మీద ఇంట్రెస్టింగ్ కంటెంట్‌ని వీక్షకుల ముందుంచుతోంది.

ఢీ జూనియర్ డాన్స్ షో‌కి హోస్ట్‌గా వ్యవహరించిన నిహారిక, ‘ముద్ద పప్పు ఆవకాయ్’, ‘నాన్న కూచి’ వంటి సోస్‌తో నటిగా, నిర్మాతగా ఆకట్టుకుంది. ‘ఒక చిన్న ఫ్యామిలీ స్టోరీ’ లాంటి మంచి ఓటీటీ కంటెంట్‌ని అందించింది. ‘హలో వరల్డ్’ అంటూ ఓటీటీ వీక్షకుల్ని ఆకట్టుకుంది.

నటిగా వెండితెరపై ‘ఒకమనసు’తో తెరంగేట్రం చేసిన నిహారిక, ‘హ్యాపీ వెడ్డింగ్’, ‘సూర్యకాంతం’ తదితర తెలుగు సినిమాలతోపాటు, ‘ఒరు నల్ల నాయ్ పాత్తు సొల్రెన్’ అనే తమిళ సినిమాలోనూ నటించిన సంగతి తెలిసిందే.

నాన్న నిర్మాత నటుడు, అన్నయ్య హీరో.. పెదనాన్న మెగాస్టార్.. చిన్నాన్న పవర్ స్టార్.. ఈ నేపథ్యంలో తనకంటూ ఓ ప్రత్యేకత.. అదీ నిర్మాతగా మంచి గుర్తింపు తెచ్చుకోవాలన్న నిహారిక ప్రయత్నాన్ని అభినందించి తీరాల్సిందే. మెగా ప్రిన్సెస్ ముందు ముందు మెగా నిర్మాతగా కూడా సత్తా చాటాలని ఆకాంక్షిస్తూ ఆమెకు పుట్టినరోజు శుభాకాంక్షలు తెలియజేస్తోంది తెలుగు బులెటిన్ డాట్ కామ్.