హిందూ దేవాలయాలపైనే ‘మతి లేని’ దాడులెందుకు జరుగుతున్నాయ్.?

తేనె తుట్టెని తీసే క్రమంలో పొరపాటున రథం తగలబడిపోయి వుంటుందంటూ, అంతర్వేది రథం విషయమై తొలుత అధికార పార్టీ నేతలు ప్రకటించేశారు. ఎవరో ఆకతాయిలు చేసిన దుశ్చర్యగానూ దీన్ని కొందరు అధికారులు అభివర్ణించిన వైనం చూశాం. అంతకు ముందు ఇంకో రథం మరో చోట తగలబడితే మతిస్థిమితం లేని వ్యక్తులు చేసిన దుశ్చర్యగా పోలీసులు అభివర్ణించారు. పిఠాపురంలో దేవతా మూర్తుల విగ్రహాలు ధ్వంసమైనప్పుడూ ఇదే పరిస్థితి.

ఇటీవల చిత్తూరు జిల్లా కుప్పంలో ఓ చిన్న దేవాలయంలో దేవతా మూర్తి విగ్రహం ధ్వంసమైతే, మతి స్థిమితం లేని ఓ మహిళ ఆ ఘాతుకానికి పాల్పడినట్లుగా పోలీసులు తేల్చారు. రికార్డు సమయంలో ఆ కేసు మిస్టరీని ఛేదించామనీ చెప్పుకున్నారు. రాష్ట్రంలో జరిగిన ఇలాంటి చాలా ఘటనల విషయంలో ‘మతి స్థిమితం లేనివారు చేసిన దుశ్చర్య..’ అంటూ అధికార పార్టీ నేతలు తేల్చారు.. విచారణలో పోలీసులూ అదే విషయాన్ని స్పష్టం చేశారు.

ఈ విషయమై వైసీపీ రెబల్ ఎంపీ రఘురామకృష్ణరాజు ఓ ఆసక్తికరమైన అనుమానాన్ని ఓ చానల్ చర్చా కార్యక్రమంలో వ్యక్తం చేశారు. ‘కేవలం హిందూ దేవాలయాల మీదనే మతి స్థిమితం లేని వ్యక్తులు ఎందుకు దాడులకు పాల్పడుతున్నారు.?’ అన్నది ఆయన ప్రశ్న. నిజమే మరి.! మతి స్థిమితం లేనివారికి మతంతో పని లేదు. ఏదో ఒక విధ్వంసానికి పాల్పడతారు. అది గుడి.. అనడానికి లేదు, ఇంకేదన్నా అనడానికి లేదు. కానీ, కేవలం హిందూ దేవాలయాల మీదనే వరుసగా దాడులు జరిగాయి, జరుగుతూనే వున్నాయి.

అంతర్వేది ఘటనను సీబీఐకి ఇచ్చేసి చేతులు దులుపుకుంది రాష్ట్ర ప్రభుత్వం. అంతేనా.? హిందూ దేవాలయాల రక్షణ విషయంలో ప్రభుత్వం చిత్తశుద్ధి ఇంతేనా.? రథాల్ని తగలబెట్టినవారే రథయాత్రలు చేస్తున్నారనీ, విగ్రహాల్ని ధ్వంసం చేసినవాళ్ళే పరామర్శ యాత్రలు చేస్తున్నారనీ గతంలో ఆరోపించిన ముఖ్యమంత్రి వైఎస్ జగన్, ఆ మాటకు కట్టుబడి ఏయే పార్టీలకు చెందిన నేతల్ని అరెస్టు చేశారో చెప్పగలిగితే బావుండేదేమో. తిరుపతి ఉప ఎన్నికల వేళ దేవాలయాలపై దాడుల అంశం ప్రస్తావనకు వస్తున్న దరిమిలా, సమాధానం చెప్పలేక ముఖ్యమంత్రి.. తిరుపతి ఉప ఎన్నిక ప్రచార సభను రద్దు చేసుకున్నారని అనుకోవచ్చా.?