తమిళనాట సినీ స్టార్స్‌ రాజకీయాల్లోకి అడుగు పెట్టడం సర్వ సాదారణం. ఇప్పటికే ఎంతో మంది సినీ ప్రముఖులు రాజకీయాల్లోకి వెళ్లి వెలుగు వెలిగారు. కమల్‌ హాసన్‌ పార్టీ పెట్టి మొన్నటి పార్లమెంటు ఎన్నికల్లో పోటీ చేశాడు. త్వరలో జరుగబోతున్న అసెంబ్లీ ఎన్నికల కోసం రెడీ అవుతున్నాడు. ఇక రజినీకాంత్‌ కూడా పార్టీ పెట్టే ఉద్దేశ్యంతోనే ఉన్నట్లుగా అనిపిస్తుంది. ఇదే సమయంలో తమిళ సూపర్‌ స్టార్ విజయ్‌ కూడా రాజకీయ పార్టీ పెట్టే యోచనలో ఉన్నట్లుగా వార్తలు వచ్చాయి. ఇలాంటి సమయంలో ఆయన తండ్రి విజయ్‌ పేరుతో పార్టీ పెట్టడం చర్చనీయాంశం అయ్యింది.
విజయ్‌ తండ్రి చంద్రశేఖర్‌ ఈ పార్టీని కొడుకు ప్రోద్బలంతోనే పెట్టి ఉంటాడు అంటూ చాలా మంది అభిప్రాయం వ్యక్తం చేస్తున్నారు. ఆలిండియా దళపతి విజయ్‌ మక్కల్‌ ఇయాక్కం పేరుతో రాజకీయ పార్టీని ప్రారంభించినట్లుగా చంద్రశేఖర్‌ ప్రకటించాడు. ఈ పార్టీతో విజయ్‌ కి సంబంధం ఉందా లేదా అంటూ జనాలు ఊగిసలాడుతున్న సమయంలో స్వయంగా విజయ్‌ స్పందించి ఆ పార్టీతో తనకు ఎలాంటి సంబంధం లేదు అంటూ ప్రకటించాడు.
విజయ్‌ రాజకీయాల్లోకి ఇప్పట్లో వచ్చే ఆలోచనలో లేనట్లుగా తెలుస్తోంది. ఏడాదికి రెండు మూడు సినిమాలు చేస్తూ 100 నుండి 200 కోట్ల వరకు సంపాదిస్తున్న విజయ్‌ హీరోగా సూపర్‌ స్టార్ గా వెలుగు వెలుగుతున్నాడు. అందుకే ఆయన పార్టీ పెట్టే ఆలోచనలో లేడని ఇండస్ట్రీ వర్గాల ద్వారా తెలుస్తోంది.