‘సైరా’ చిరంజీవి: వసూళ్ళతో పనేంటి.?

చిరంజీవి చూడని వసూళ్ళు వున్నాయా.? చిరంజీవి చూడని సక్సెస్‌లు వున్నాయా.? నిజానికి చిరంజీవి చేయని పాత్రలూ లేవు. కానీ, 150 సినిమాలు చేశాక కూడా చిరంజీవిలోని నటుడు ఇంకా ఏదో చెయ్యాలనే తపనపడ్డాడు. ఆ తపన ఫలితమే ‘సైరా నరసింహారెడ్డి’. ఇక్కడితో ఆ నటుడికి పూర్తిస్థాయిలో తృప్తి లభిస్తుందని అనుకోలేం. ఎందుకంటే, ఇంకోటేదో చేసెయ్యాలని ఆయనలోని నటుడు పరితపించడం ఇప్పుడే మొదలవుతుంది.

ఇక, ‘సైరా నరసింహారెడ్డి’ ఎంత వసూలు చేస్తుంది.? అంటే, అది అప్రస్తుతం అంటున్నారు చిరంజీవి. ‘రంగస్థలం’ సినిమా టైమ్‌లోనే రామ్‌చరణ్‌ ఓ నిర్ణయం తీసుకున్నాడు, తన సినిమా వసూళ్ళకు సంబంధించి అధికారిక ప్రకటనలు, అనవసర పబ్లిసిటీ స్టంట్లూ చేయకూడదని. అందుకే ‘వినయ విధేయ రామ’ సినిమాకి ఎలాంటి ‘వసూళ్ళ పబ్లిసిటీ హంగామా’ కన్పించలేదు. డిజాస్టర్‌ టాక్‌తోనూ, మెరుగైన వసూళ్ళను ‘వినయ విధేయ రామ’ సాధించింది. కొంత నష్టాల్ని ఆ సినిమా మిగిల్చినా, 70 కోట్లకు పైగా షేర్‌ సాధించిన సినిమా అది.

‘సైరా నరసింహారెడ్డి’ విషయానికొస్తే, హిందీలో ఆకట్టుకోలేకపోయింది. తమిళనాడులోనూ అంతంతమాత్రమే. తెలుగులో మాత్రం వసూళ్ళ దుమ్ము రేపేసింది. 100 కోట్లు ఆల్రెడీ షేర్‌ కొల్లగొట్టేసింది. ‘చరణ్‌ తీసుకున్న నిర్ణయం సముచితం. అందుకే ఈ సినిమాకీ వసూళ్ళ గురించి మేం ఎక్కడా మాట్లాడం. ఇకపైనా వచ్చే సినిమాల విషయంలోనూ ఇదే ఆలోచన కొనసాగిస్తాం..’ అని చిరంజీవి స్పష్టం చేశారు. నిజమే, బాక్సాఫీస్‌ రికార్డుల రారాజుగా చిరంజీవి పేరు చిరస్థాయిగా నిలిచిపోతుంది.

తెలుగు సినిమా వసూళ్ళకు కొత్త అర్థం చెప్పిన చిరంజీవి, సుదీర్ఘ కాలంపాటు నెంబర్‌ వన్‌ స్థానాన్ని నిలబెట్టుకున్నారు. ఇప్పుడూ ఆయన కాకపోతే ఇంకెవరు.? అన్న చర్చే టాలీవుడ్‌లో జరుగుతోంది. ఓ పెద్ద సినిమా వసూళ్ళని ఇంకో పెద్ద సినిమా కొల్లగొట్టాలి.. చిన్న సినిమాలూ, పెద్ద సినిమాల్ని మించి వసూళ్ళను సాధించాలి.. అప్పుడే కదా, మజా వుంటుంది. వసూళ్ళ ప్రచారంలో పడి కొట్టుకుంటోంటే.. తెలుగు సినిమా తన పరువు తానే తీసుకున్నట్టవుతుందన్నది నిర్వివాదాంశం.