పృధ్వీ ఓవరాక్షన్‌ వైఎస్‌ జగన్‌ రియాక్షన్‌.!

సినీ నటుడు పృధ్వీ రాజ్‌, వైఎస్సార్‌ కాంగ్రెస్‌ పార్టీ తరపున ఎన్నికల ప్రచారంలో కష్టపడి, వైసీపీ గెలుపులో తనవంతు పాత్ర పోషించిన సంగతి తెలిసిందే. పృధ్వీ వల్ల వైసీపీకి కలిగిన అడ్వాంటేజ్‌ ఏంటన్నది వేరే చర్చ. అనేక ఈక్వేషన్స్‌ వేసుకుని పృధ్వీకి ఎస్వీబీసీ ఛానెల్‌ బాధ్యతల్ని అప్పగించారు ముఖ్యమంత్రి వైఎస్‌ జగన్‌. చాలా బాధ్యత గల పదవి ఇది. పదవి దక్కడంతో పండగ చేసుకున్న పృధ్వీ, ఈ క్రమంలో అత్యుత్సాహం ప్రదర్శిస్తున్నాడు. సినీ పరిశ్రమలో కొందరు వ్యక్తుల్ని టార్గెట్‌ చేస్తున్నాడు.

స్వామి భక్తి బాగానే ఉంది కానీ, తెలుగు సినీ పరిశ్రమ జగన్‌ విజయాన్ని గుర్తించలేదంటూ, పదే పదే పృధ్వీ చేస్తున్న వ్యాఖ్యలు హాస్యాస్పదమవుతున్నాయి. వైఎస్‌ జగన్‌ ఘన విజయం సాధించిన మాట వాస్తవం. కానీ, దాన్ని గుర్తించాలా.? వద్దా.? అన్నది ఆయా వ్యక్తుల వ్యక్తిగత ఆలోచనల్ని బట్టి ఉంటుంది. బతిమాలుకుని, బెదిరించి జగన్‌ గెలుపుని మెచ్చుకోవాలనడం సబబు కాదు.

సినీ పరిశ్రమలో ఇప్పటిదాకా, సాధించిన పేరు ప్రఖ్యాతలన్నీ మంట గలిపేసుకున్నాడు పృధ్వీ. ప్రజలు గెలిపిస్తే వచ్చిన పదవి కాదది. నామినేటెడ్‌ పోస్ట్‌ అది. దానికే ఇంతలా విర్రవీగడమేంటని సినీ పరిశ్రమలో చర్చ జరుగుతోంది. మరోపక్క, తదుపరి ఎన్నికల్లో లోక్‌సభకు పోటీ చేస్తానంటూ అప్పుడే ప్రకటించేసుకున్నాడు పృధ్వీ. పశ్చిమగోదావరి జిల్లా నుండి పోటీ చేస్తాడట.

పోటీ చేయాలా.? వద్దా.? ఎక్కడి నుండి పోటీ చేయాలి..? అన్న విషయాలపై నిర్ణయం తీసుకోవాల్సింది వైఎస్‌ జగన్‌. పైగా పోటీ చేయాల్సిన జిల్లా గురించి తొందరపడి ముందే పృధ్వీ ప్రకటించడంతో, వైసీపీ నేతలు ఆగ్రహం వ్యక్తం చేస్తూ, అధినేత వైఎస్‌ జగన్‌కి ఫిర్యాదు చేశారట. ‘ప్రత్యర్ధుల మీదా, వ్యతిరేకుల మీదా నోరు జారినట్లు ఇలాంటి విషయాల్లో అత్యుత్సాహం ప్రదర్శిస్తే, తేడాలొస్తాయ్‌..’ అని వైఎస్‌ జగన్‌ డైరెక్ట్‌గా పృధ్వీకి వార్నింగ్‌ ఇచ్చారని రాజకీయ వర్గాల్లో ప్రచారం జరుగుతోంది. మరి ఈ గాసిప్స్‌పై పృధ్వీ ఏమంటాడో.?