‘లేడీ లయన్’.. ఓటీటీ వేదిక, కొత్త నిర్మాణ సంస్థ ప్రారంభం.!

ప్రస్తుతం ఓటీటీ ట్రెండ్ నడుస్తోంది. పెద్ద సినిమా అయినా, చిన్న సినిమా అయినా.. ఓటీటీ వాటికి పెద్ద దిక్కుగా మారిందంటే, అంతా కరోనా ప్రభావమేనని అనుకోవాలి. అయితే, సినిమాని వెండితెర మీదనే చూడాలన్నది మెజార్టీ సినీ ప్రముఖులు చెప్పే మాట. అంతే మరి, థియేటర్లలో వుండే హోరు, జోష్.. ఓటీటీలో సినిమా చూస్తే రాదు కదా.? కానీ, మార్పుని తప్పక ఆహ్వానించి తీరాల్సిందే.

ఓటీటీ అంటే కేవలం సినిమాలే కాదు, అంతకు మించి. వెబ్ సిరీస్ ట్రెండ్.. ఓటీటీ పుణ్యమా అని మరింత పెరిగింది. ఈ క్రమంలో చాలా ఓటీటీ వేదికలు కొత్తగా పుట్టుకొచ్చాయి. అలా వస్తోన్నవాటిల్లో తమదీ ఒకటని నిర్మాత జి.ఆర్.జి.ఎన్.రాజు చెప్పారు. లేడీ లయన్ పేరుతో ఓటీటీ వేదికు ప్రారంభిస్తున్నట్లు ప్రకటించారు నిర్మాత రాజు. కాగా, లేడీ లయన్ క్రియేషన్స్ పేరుతో నిర్మాణ సంస్థనీ ప్రకటించారు నిర్మాత రాజు.

తమ బ్యానర్‌లో మంచి మంచి సినిమాల్ని ప్రారంభించబోతున్నామనీ, ఈ నెలలోనే ఓ సినిమా కూడా ప్రారంభం కాబోతోందని అన్నారు. ఓటీటీ కోసం వెబ్ సిరీస్ ఇప్పటికే ప్రకటించామని రాజు చెప్పుకొచ్చారు. ఇటు సినిమాలు, అటు వెబ్ సిరీస్‌లతో తమ సంస్థ కొత్త ప్రయాణం ప్రారంభిస్తోందనీ, ఈ ప్రయాణంలో కొత్త టాలెంట్‌ని ప్రోత్సహిస్తామనీ, సినీ రంగం పట్ల మక్కువతోనే ఈ నిర్మాణ సంస్థ నెలకొల్పామనీ లేడీ లయన్ క్రియేషన్స్ అధినేత జి.ఆర్.జి.ఎన్.రాజు చెప్పారు.

ప్రముఖ నిర్మాత కె.ఎస్.రామారావు చేతుల మీదుగా ఈ బ్యానర్ పేరు ప్రకటితమైంది. ప్రముఖ దర్శక నిర్మాత తమ్మారెడ్డి భరద్వాజ, దర్శకుడు చల్లా భాను కిరణ్, ఎ.రమేష్ ప్రసాద్, వీర శంకర్, గుడివాడ మునిసిపల్ మాజీ చైర్మన్ లంకదాసరి ప్రసాద్ సహా పలువురు ప్రముఖులు ఈ కార్యక్రమంలో పాల్గొన్నారు. తెలంగాణ సాంస్కృతిక శాఖ ఛైర్మన్ మామిడి హరికృష్ణ లేడీ లయన్ క్రియేషన్స్ బ్యానర్ ప్రారంభోత్సవంలో పాల్గొని, నిర్మాత జి.ఆర్.జి.ఎన్.రాజు సినీ, వెబ్ సిరీస్ నిర్మాణంలో సక్సెస్ అవ్వాలని ఆకాంక్షించారు.