అల్లు వారి డిజిటల్ విప్లవం మొదలైందిగా!

ప్రస్తుతం డిజిటల్ ప్లాట్ ఫామ్స్ ఎంతలా దూసుకుపోతున్నాయో మనందరం చూస్తున్నాం. భవిష్యత్తులో ఓటిటి ప్లాట్ ఫామ్స్ దే హవా అని ఇప్పటికే స్పష్టమైంది కూడా. థియేటర్లకు రానున్న ఏళ్లలో మరింత గడ్డు కాలం ఎదురయ్యే పరిస్థితులు ఉన్నాయి. చూస్తుంటే మరికొన్ని ఏళ్లలో ప్రేక్షకులు పూర్తిగా ఈ ఓటిటి ప్లాట్ ఫామ్స్ కే అలవాటయ్యే పరిస్థితి ఉంది. ఇప్పటికే అమెజాన్ ప్రైమ్ యొక్క హవా ఎలా ఉందో మనం చూస్తూనే ఉన్నాం. దీనికి తోడు హాట్ స్టార్, నెట్ ఫ్లిక్స్, జీ 5, ఈటీవీ విన్, సన్ నెక్స్ట్ వంటి ఓటిటి ప్లాట్ ఫామ్స్ సత్తా చాటడానికి ప్రయత్నిస్తున్నాయి.

మారుతున్న పరిస్థితులకు తగ్గట్లుగా మారే అగ్ర నిర్మాత అల్లు అరవింద్ చూపు ఇప్పుడు ఈ ఓటిటి ప్లాట్ ఫామ్ బిజినెస్ పై పడినట్లు తెలుస్తోంది. అల్లు అరవింద్ సొంతంగా ఒక ఓటిటి ప్లాట్ ఫామ్ ను రూపొందించబోతున్నాడట. దానికి కావాల్సిన సాంకేతిక పనులు ఇప్పటికే ఓ కొలిక్కి వస్తున్నట్లు తెలుస్తోంది. వచ్చే ఏడాది ఆరంభంలో ఈ ప్లాట్ ఫామ్ ను భారీ స్థాయిలో లాంచ్ చేస్తారట. ఇందులో తొలి సినిమాకు సంబంధించిన ఒప్పందం కూడా జరిగిపోయినట్లు తెలుస్తోంది.

ఇటీవలే నిఖిల్ హీరోగా వచ్చిన అర్జున్ సురవరం ఎంత పెద్ద హిట్ అయిందో తెల్సిందే. ఈ సినిమా డిజిటల్ హక్కులను అల్లు అరవింద్ సొంతం చేసుకున్నాడట. అర్జున్ సురవరం రిలీజ్ కాకుండా ఇబ్బంది పడుతున్న తరుణంలో అది రిలీజ్ అయ్యేలా చేసి, చిరంజీవిని చీఫ్ గెస్ట్ గా ప్రీ రిలీజ్ ఈవెంట్ కు కూడా పంపాడు అల్లు అరవింద్. దానికి ప్రతిగా డిజిటల్ హక్కులను రాయించుకున్నాడు. దీంతో పాటు గీతా ఆర్ట్స్ నిర్మించనున్న సినిమాలు అన్నీ ఈ ఓటిటి ప్లాట్ ఫామ్ లో ఉండనున్నాయి. అల్లు అరవింద్ తో పాటు మరికొంత మంది నిర్మాతలు కూడా ఇందులో భాగస్వామి అయినట్లు తెలుస్తోంది. పూర్తి వివరాలు త్వరలో తెలుస్తాయి.