రాజ్యాంగ వ్యవస్థల్ని ‘హెచ్చరిస్తోన్న’ వైఎస్‌ జగన్‌ అభిమానులు.!

వాళ్ళంతా వైఎస్‌ జగన్‌ అభిమానులట.. వైసీపీ నేతలు కూడా.! రాజ్యాంగ వ్యవస్థలకు హెచ్చరికలు జారీ చేసేస్తున్నారు.! ‘రాజ్యాంగ వ్యవస్థ పేరుతో ప్రజాస్వామ్య ప్రభుత్వానికి సంకెళ్ళు వేస్తే చూస్తూ ఊరుకోం.. ప్రజల అభిమానం పొందిన ప్రభుత్వాన్ని ప్రశ్నించే హక్కు మీకు ఎవరు ఇచ్చారు.?’ అని పేర్కొంటూ వైసీపీ నేతలు ఆంధ్రప్రదేశ్‌ హైకోర్టుకి కూత వేటు దూరంలోనే గల బెజవాడ కనకదుర్గమ్మ వారధిపై ఫ్లెక్సీలు ఏర్పాటు చేశారు.

ముఖ్యమంత్రి వైఎస్‌ జగన్‌ సహా, పలువురు వైసీపీ నేతల పొటోలతో వైసీపీ మద్దతుదారులు ఈ ఫ్లెక్సీలను ఏర్పాటు చేయడం అందర్నీ విస్మయానికి గురిచేస్తోంది. గడచిన ఏడాది కాలంలో 100 సార్లకు పైగానే న్యాయస్థానాలో వైసీపీ ప్రభుత్వానికి మొట్టికాయలు పడ్డాయి. దీన్ని జీర్ణించుకోలేక న్యాయ వ్యవస్థపై వైసీపీ నేతలు అవాకులు చెవాకులు పేలుతున్న విషయం విదితమే. ఈ వ్యవహారంపై ఇప్పటికే న్యాయస్థానం ఆగ్రహం వ్యక్తం చేసింది కూడా. అయినాగానీ, వైసీపీ నేతల తీరు మారడంలేదు.

స్పీకర్‌ తమ్మినేని సీతారాం కూడా న్యాయ వ్యవస్థపై ‘అత్యుత్సాహంతో’ కొన్ని వ్యాఖ్యలు చేయడం చూస్తున్నాం. మన ప్రజాస్వామ్య వ్యవస్థలో న్యాయ వ్యవస్థ కూడా అత్యంత కీలకమైనది. ప్రజలెన్నుకున్న ప్రభుత్వమైనాసరే, రాజ్యాంగానికి లోబడి మాత్రమే పనిచేయాల్సి వుంటుందన్న విషయాన్ని రాష్ట్రంలో అధికార వైసీపీ విస్మరిస్తే ఎలా.?

వైసీపీ, భారతదేశంలో ఓ రాష్ట్రానికి మాత్రమే పరిమితం. భారత దేశంలో ఆంధ్రప్రదేశ్‌ ఓ రాష్ట్రం మాత్రమే. భారత రాజ్యాంగాన్ని అన్ని రాష్ట్రాల్లోని ప్రభుత్వాలే కాదు, దేశంలోని ప్రతి ఒక్కరూ గౌరవించి తీరాలి. ‘రాజ్యాంగ వ్యవస్థ’ పేరుతో సంకెళ్ళు వేయాలనుకుంటే.. అంటూ, హెచ్చరించే స్థాయికి అధికార వైసీపీ నేతలు కావొచ్చు, మద్దతుదారులు కావొచ్చు.. అత్యుత్సాహం చూపుతున్నారంటే, పరిస్థితి అత్యంత జుగుప్సాకరంగా తయారయ్యిందన్నది నిర్వివాదాంశం.

ఈ పరిస్థితుల్లో ఇలాంటి విపరీత ధోరణులపై న్యాయ వ్యవస్థ ఉక్కుపాదం మోపుతుందో.. లేదంటే, కేంద్రమే చర్యలు తీసుకుంటుందోగానీ.. రాష్ట్రంలో రాజ్యాంగ విలువల్ని కాపాడాల్సిన అవసరం మాత్రం ఏర్పడిందన్నది నిర్వివాదాంశం.