వీళ్లకి 3.. వాళ్లకు 23: కలసి రావేమో!

వాస్తు, ముహూర్తాలు, సంఖ్యా శాస్త్రం విషయంలో రాజకీయ నాయకులకు కాస్త గట్టి నమ్మకాలే ఉంటాయి. కొన్ని కొన్ని అంకెలు తమకు కలసి రావేమో అని భావిస్తుంటారు. ప్రత్యర్థులు సైతం ఆయా అంశాలపై వారిపై సెటైర్లు కూడా వేస్తుంటారు. తెలుగుదేశం పార్టీకి ఆగస్టు సంక్షోభం మాదిరిగానే 23 కూడా కలిసి రాలేదనే అభిప్రాయాలు ఇటీవల కాలంలో ఎక్కువైన సంగతి తెలిసిందే. గతంలో వైసీపీ నుంచి 23 మంది ఎమ్మెల్యేలు, ముగ్గురు ఎంపీలను తీసుకున్న టీడీపీకి దేవుడు అదే సంఖ్యలో ఎమ్మెల్యేలు, ఎంపీలను మిగిల్చాడంటూ వైసీపీ నేతలు సెటైర్లు వేశారు.

తాజాగా వైసీపీ పై అదే తరహాలో వ్యంగ బాణాలు సంధించారు టీడీపీ సీనియర్ నేత గోరంట్ల బుచ్చయ్య చౌదరి. మూడు అంకే వైసీపీకి మాడు పగలగొడుతుందేమోనని ఎద్దేవా చేశారు. ‘‘మూడు మాస్కులు అన్నారు క్వాలిటీ లేకపోయే.. మూడు రాజధానులు అన్నారు క్లారిటీలేకపోయే.. మూడు రంగులు అన్నారు ఒక రంగుకి మిగిలిపోయే.. మొత్తానికి ఈ మూడు అన్నది వైసీపీ ప్రభుత్వానికి మాడు పగిలేందుకే అనుకుంటా’’ అని సెటైరికల్ గా వేసిన ట్వీట్ సోషల్ మీడియాలో జోరుగా తిరుగుతోంది.

ప్రతి ఇంటికీ మూడు మాస్కులు ఇస్తానని ఏపీ సీఎం జగన్ ప్రకటించిన సంగతి తెలిసిందే. అయితే, వీటి పంపిణీ సక్రమంగా జరగలేదనే విమర్శలున్నాయి. చాలామందికి ఇవి అందలేదని, ఇచ్చిన మాస్కులు కూడా నాణ్యతపరంగా బాగోలేదని విపక్షాలు ఆరోపణలు చేశాయి. ఇక మూడు రాజధానుల అంశం ఎంత రచ్చ అయిందో చెప్పక్కర్లేదు. రాజధాని తరలింపునకు పెట్టిన ఏ ముహూర్తం కూడా కలిసి రాలేదు. దీంతో ప్రస్తుతానికి ఈ ప్రతిపాదన సస్పెన్స్ లో పడింది.

అలాగే పంచాయతీ కార్యాలయాలకు పార్టీ మూడు రంగులు వేయాలన్న నిర్ణయంపై కోర్టులో తల బొప్పి కట్టింది. దీంతో నిజంగానే మూడు అనేది వైసీపీకి కలసి రాదా అనే సందేహాలు వైసీపీ శ్రేణుల్లో మొదలయ్యాయి. వీళ్లకు మూడు.. వాళ్లకు ఇరవై మూడు.. కలిసి రావేమో అనే సెటైర్లు కనిపిస్తున్నాయి. తాజాగా ఏపీ సర్కారు ఎంతో అట్టహాసంగా ప్రారంభించిన 108, 104 వాహనాల ప్రారంభోత్సవం అనంతరం ఒకదానికొకటి ఢీకొని మూడు వాహనాలు దెబ్బతినడం గమనార్హం.

మూడు మాస్కులు అన్నారు క్వాలిటీ లేకపోయే…
మూడు రాజధానులు అన్నారు క్లారిటీ లేకపోయే…
మూడు రంగులు అన్నారు
ఒక రంగు కి మిగిలి పోయే…

మొత్తానికి ఈ మూడు అన్నది వైసీపీ ప్రభుత్వానికి మాడు పగిలేందుకే అనుకుంటా…#GBC🔥#SatireNextLevel

— Gorantla butchaiah choudary (@GORANTLA_BC) June 30, 2020