నందమూరి బాలకృష్ణకు అభిమానులు పెట్టుకున్న పేరు యువరత్న. అదే ట్యాగ్ తో ఆయన చాలా ఏళ్లు ట్రావెల్ చేశారు కూడా. అయితే.. బాలకృష్ణను కొన్నేళ్లుగా నటసింహం అని పిలుచుకుంటున్నారు ఫ్యాన్స్. కారణం.. ఆయనలోని నటనా సామర్ధ్యాన్ని తెరపై సరికొత్తగా ఆవిష్కరించడమే. దీనికి ఆద్యుడు మాత్రం ఖచ్చితంగా దర్శకుడు బోయపాటి శ్రీను అనేది వాస్తవం. 2010లో వచ్చిన సింహ సినిమాతో బాలకృష్ణ మేకోవర్, నటన, స్టయిల్ అన్నీ మారిపోయాయి. బాలకృష్ణను ఏ దర్శకుడు ఎలా చూపినా.. బోయపాటి స్టయిలే వేరు. వారిద్దరి కాంబోలో వరుసగా మూడు బ్లాక్ బస్టర్లు రావడం గొప్ప విషయం. ఇందుకు బాలకృష్ణ-బోయపాటి శ్రీను మధ్య ఉన్న మంచి రిలేషన్, అవగాహన, బాలకృష్ణ బాడీ లాంగ్వేజ్ కు తగ్గ కథలను బోయపాటి డిజైన్ చేయడం కారణం.
సరికొత్తగా బాలకృష్ణ మేకోవర్..
బాలకృష్ణ కెరీర్లో సింహ ఓ సంచలనం. చూడూ.. ఒకవైపే చూడు అనే డైలాగ్ పేలిపోయింది. లెక్చరర్, డాక్టర్ క్యారెక్టర్లలో అంతకుముందు మరే దర్శకుడు చూపని విధంగా బాలకృష్ణను బోయపాటి సరికొత్తగా చూపి ప్రేక్షకుల్ని మెస్మరైజ్ చేశాడు. దీంతో సినిమా బ్లాక్ బస్టర్ హిట్ అయింది. గంభీరం, హావభావాలకు అత్యధిక ప్రాధాన్యం ఇచ్చి తనలోని నటుడ్ని మరోసారి పరిచయం చేశారు బాలకృష్ణ. ఆ తర్వాత 5ఏళ్లకు వచ్చిన లెజెండ్ ఏకంగా సింహను మించి విజయం సాధించింది. ఈసారి కూడా బాలకృష్ణ బాడీ లాంగ్వేజ్ ఆధారంగా కథ రాసుకుని తెరపై అంతే గంభీరంగా చూపించాడు దర్శకుడు. కథా ప్రాధాన్యాన్ని మర్చిపోక బోయపాటి తీసుకున్న జాగ్రత్తలే సింహాను మించి లెజెండ్ ఘన విజయానికి కారణమైంది. బాలకృష్ణ-బోయపాటి కాంబినేషన్ లో ముచ్చటగా వచ్చిన మూడో సినిమా అఖండ.
సరికొత్త పాత్రలో బాలకృష్ణ..
లెజండ్ వచ్చిన ఆరేళ్లకు వచ్చిన అఖండలో అఘోరాగా బాలకృష్ణ నట విశ్వరూపం చూపారు. ఫ్యాన్స్, ప్రేక్షకులు అమితాశ్చర్యం పొందారు. కథ, కథనంతో ప్రేక్షకుల్ని ఆకట్టుకున్నారు బోయపాటి. అఘోరాగా బాలకృష్ణ సరికొత్త పాత్రలో ఇమిడిపోయారు.. అనేకంటే ఆ పాత్రలో ఒదిగిపోయారని చెప్పాలి. దీంతో కరోనా పరిస్థితుల తర్వాత తెలుగులో నమోదైన తొలి బ్లాక్ బస్టర్ హిట్ గా అఖండ నిలిచింది. బాలకృష్ణ-బోయపాటి శ్రీను కాంబినేషన్లో వచ్చిన మూడు సినిమాల్లో బాలకృష్ణ ద్విపాత్రాభినయం చేయడం విశేషం. బాలకృష్ణకు అచ్చొచ్చిన దర్శకులుగా పేరొందిన కోడి రామకృష్ణ, బి.గోపాల్ సరనన బోయపాటి శ్రీను ఆ ఘనతను సొంతం చేసుకున్నారు. బాలకృష్ణకు సరికొత్త ఇమేజ్ ఇవ్వడమే కాదు.. బాలకృష్ణ నటనను మరో మలుపు తిప్పారు బోయపాటి శ్రీను. అందుకే వీరిద్దరి కాంబినేషన్ అంటేనే ఓ క్రేజ్.