కళాకారుల సంక్షేమమే ముఖ్యం… పెద్దరికం, కుర్చీలు కాదు: చిరంజీవి

సినిమా ఇండస్ట్రీలో తనకు పెద్దరికం అనుభవించాలని లేదని, ఎలాంటి కుర్చీలపై వ్యామోహం లేదని, కేవలం కళాకారుల సంక్షేమమే తనకు ముఖ్యమని అన్నారు మెగాస్టార్ చిరంజీవి. గురువారం సినీ కార్మికుల కోసం చిత్రపురి కాలనీలో నిర్మించిన నూతన గృహ సముదాయాన్ని ప్రారంభించారు చిరంజీవి. లబ్దిదారులకు పట్టాలు అందించిన అనంతరం ఆయన మీడియాతో మాట్లాడారు.

సినిమా షూటింగ్స్ తో చాలా బిజీగా ఉండి ఈ కార్యక్రమానికి రాలేను అని చెబుతాం అనుకున్నానని చిరంజీవి అన్నారు. “అయితే చైర్మన్ అనిల్ దొరై సరిగ్గా 22 ఏళ్ల క్రితం ఇదే రోజున చిత్రపురి కాలనీకి శంకుస్థాపన జరిగిందని, అదే రోజున ఇప్పుడు గృహ సముదాయాన్ని ప్రారంభించాలని భావిస్తున్నామని చెప్పినప్పుడు ఇందులో నేను కూడా భాగం కావాలని భావించాను. అందుకే నా ప్రోగ్రామ్స్ ను పక్కనపెట్టి ఇక్కడికి వచ్చాను. సినీ కార్మికులకు సైతం సొంత ఇల్లు ఉండాలని కలలు కంటారు. దాన్ని నిజం చేయడం కోసం కృషి చేసిన అందరికీ నా అభినందనలు” అని చిరంజీవి తెలిపారు.

ఇంకా మాట్లాడుతూ, “ఈ సందర్భంగా మనం డా. ఎన్. ప్రభాకర్ రెడ్డిని స్మరించుకుని నివాళులు అర్పించాలి. ఇది ఆయన మొదలుపెట్టిన మహత్కార్యం. నాకు తెలిసి మరే ఇండస్ట్రీలోనూ సినీ కార్మికుల కోసం గృహ సముదాయం లేదు” అని అన్నారు.

ఇంకా పెద్దరికం అంశంపై స్పందిస్తూ తనకు పెద్దరికం అనుభవించాలని లేదని, అవసరం ఉన్నప్పుడు తప్పకుండా భుజం కాస్తానని అన్నారు. “నాకు అవసరం అనుకున్న దానికంటే ఆ భగవంతుడు ఎక్కువే ఇచ్చాడు. దానిలో కొంత మొత్తాన్ని కార్మికుల సంక్షేమం కోసం ఖర్చు చేస్తున్నా” అని చిరంజీవి అన్నారు.