‘స్టూడెంట్‌ నెం.1’ సినిమాకి 18 ఏళ్ళు పూర్తయ్యాయి. రాజమౌళి దర్శకత్వంలో యంగ్‌ టైగర్‌ ఎన్టీఆర్‌ హీరోగా నటించిన చిత్రమది. అప్పట్లో ఆ సినిమా ఘనవిజయం సాధించింది. ఈ నేపథ్యంలో యంగ్‌ టైగర్‌ ఎన్టీఆర్‌, రాజమౌళి.. ఈ ఇద్దరూ ఆ నాటి సంగతుల్ని సోషల్‌ మీడియా వేదికగా గుర్తు చేసుకున్నారు.

ప్రస్తుతం రాజమౌళి – ఎన్టీఆర్‌ కలిసి ‘ఆర్‌ఆర్‌ఆర్‌’ సినిమా కోసం పనిచేస్తున్నారు. ‘స్టూడెంట్‌ నెం.1’ సినిమాలో చాలావరకు రామోజీ ఫిలిం సిటీ లొకేషన్లను వాడుకున్న విషయం విదితమే. ఇప్పుడూ అక్కడే వున్నారు రాజమౌళి, ఎన్టీఆర్‌. అచ్చంగా ఆనాటి ఆ పరిస్థితులకు తగ్గట్టుగా ఇప్పుడు లేటెస్ట్‌గా ఫొటోలు దిగి, వాటిని సోషల్‌ మీడియాలో ఇద్దరూ పోస్ట్‌ చేశారు. యంగ్‌ టైగర్‌ ఏం చేసినా సంచలనమే. రాజమౌళి సంగతి సరే సరి. అప్పుడే పద్ధెనిమిదేళ్ళయిపోయిందా.? అని అభిమానులు ఆశ్చర్యపోతున్నారు.

నిజమే, ఈ 18 ఏళ్ళలో యంగ్‌ టైగర్‌ చాలా మారిపోయాడు. ఎన్నో విజయాల్ని అందుకున్నాడు, కొన్ని ఫ్లాపుల్ని కూడా చూశాడు. టాలీవుడ్‌ అగ్రహీరోల్లో ఇప్పుడు ఎన్టీఆర్‌ కూడా ఒకడు. మరోపక్క, రాజమౌళి.. తెలుగు సినిమా ఖ్యాతిని ప్రపంచానికి చాటి చెప్పే స్థాయికి ఎదిగాడు. ఎన్టీఆర్‌ – రాజమౌళి వేసిన తొలి అడుగు ఓ అద్భుతం. ఆ తర్వాత ‘సింహాద్రి’ సినిమాతో మరో ఘనవిజయాన్ని అందుకున్నారు. మధ్యలో ఈ ఇద్దరూ ‘యమదొంగ’ సినిమా కోసం పనిచేశారు.

ఇప్పుడు ముచ్చటగా నాలుగోసారి.. రాజమౌళి – ఎన్టీఆర్‌ చేతులు కలిపారు. ‘ఆర్‌ఆర్‌ఆర్‌’ సినిమాకి అదనపు ఆకర్షణ మెగా పవర్‌ స్టార్‌ రామ్‌చరణ్‌ అని ప్రత్యేకంగా చెప్పాల్సిన పనిలేదు కదా! ఏదిఏమైనా, యంగ్‌ టైగర్‌ ఎన్టీఆర్‌.. జక్కన్న రాజమౌళి ఆనాటి ఆ తీపి గుర్తుల్ని గుర్తు చేసుకుంటోంటే.. అభిమానుల ఆనందానికి హద్దులుంటాయా.?