ఓ వైపు సంక్షేమం.. ఇంకో వైపు నిలువు దోపిడీ.!

పొరుగు రాష్ట్రాలతో పోల్చితే, ఆంధ్రప్రదేశ్‌లో పెట్రోల్‌, డీజిల్‌ ధరలు ఎక్కువ. ఇతర రాష్ట్రాలతో పోల్చితే అత్యద్భుతంగా సంక్షేమ పథకాల్ని అమలు చేసేస్తున్నామని చెప్పుకుంటోన్న ప్రభుత్వం, ఇతర రాష్ట్రాల కంటే ఆంధ్రప్రదేశ్‌లో ‘పన్నులు ఎక్కువ’ అని కూడా చెప్పుకుంటే మంచిదేమో.! కానీ, అలా ఏ ప్రభుత్వమూ చేయదు. చంద్రబాబు హయాంలో కూడా ఆంధ్రప్రదేశ్‌లో పెట్రోలు, డీజిల్‌ ధరలు ఎక్కువే.. ఇతర రాష్ట్రాల కంటే. అప్పుడు చంద్రబాబు చెప్పిన కథ వేరు, ఇప్పుడు వైఎస్‌ జగన్‌ చెబుతున్న కథ వేరు. కానీ, ప్రజల్ని నిలువు దోపిడీ చేస్తున్న వైనం మాత్రం ఒక్కటే. ‘పెనం మీద నుంచి పొయ్యిలో పడటం’ అంటే ఇదే మరి.

ప్రతి నెలా చివరి వారంలో, మరుసటి నెల ఖర్చులెలా.? అన్న ఆందోళన రాష్ట్ర ఆర్థిక శాఖలో కనిపిస్తోంది. దేశంలో ఏ రాష్ట్రానికీ లేని ప్రత్యేక పరిస్థితి ఇది. అందుకే, ఎప్పటికప్పుడు జనాన్ని బాదేయడంపై కసరత్తులు చేయాల్సి వస్తోంది. రాష్ట్రంలో రాష్ట్రీయ రహదారులపై టోల్‌ గేట్ల వ్యవహారంపై గత కొద్ది రోజులుగా చర్చ జరుగుతున్న విషయం విదితమే. అది అతి త్వరలో అమల్లోకి రాబోతోంది. తద్వారా సుమారు 400 కోట్ల రూపాయల ఆదాయాన్ని అంచనా వేస్తోంది రాష్ట్ర ప్రభుత్వం. ఏ బాదుడు బాదినా, దానికి ఓ కారణం ప్రభుత్వం దగ్గర ఎప్పుడూ వుంటుంది. మొన్నామధ్య ‘రోడ్లను బాగు చేయడం కోసం..’ అంటూ ప్రభుత్వ పెద్దలు ఓ కథ చెప్పారు. కానీ, రాష్ట్రంలో రోడ్ల పరిస్థితి ఎలా వుందో.. ఆ రోడ్ల మీద గోతుల్లో పడ్డ వాహనాల్ని నడుపుతున్నవారికే తెలుసు.

కొన్ని ప్రాంతాల్లో అయితే, అసలు రోడ్లున్నాయా.? రోడ్లు కొట్టుకుని ఉత్త మట్టి మాత్రమే మిగిలిందా.? అన్న అనుమానం కలగక మానదు. అలాంటి రోడ్లు బాగు చేయడానికి మళ్ళీ టోల్‌ గోట్లు అవసరమయ్యాయి ప్రభుత్వానికి. రాష్ట్రం తొలుత అభివృద్ధి చెందాలి.. ఆ అభివృద్ధి ద్వారా ఆదాయం పెరిగితే, అప్పుడు కదా సంక్షేమ ఫలాల్ని ప్రజలకు అందించాలి. కానీ, ఇక్కడంతా రివర్స్‌. సంక్షేమానికి పెద్ద పీట వేస్తున్నారు.. అదే మొదటి ప్రాధాన్యత అయిపోయింది. ఆ సంక్షేమం కోసం మళ్ళీ జనాన్నే బాదేస్తున్నారు. అంటే, ఓ వైపు సంక్షేమం.. ఇంకో వైపు నిలువు దోపిడీ అన్నమాట.