నారా లోకేష్‌ పెళ్ళితో విజయసాయిరెడ్డికి నష్టమేంటి.?

రాజకీయాలు రోజురోజుకీ మరింత దిగజారిపోతున్నాయి. ఒకరు తక్కువ ఒకరు ఎక్కువ అనలేంగానీ, దాదాపు అన్ని రాజకీయ పార్టీలకు చెందిన నేతలూ హద్దులు దాటేస్తున్నారు. కింది స్థాయి కార్యకర్తలో ఆయా పార్టీల మద్దతుదారులో నోరు జారితే అదో లెక్క. బాధ్యతాయుతమైన పదవుల్లో వున్నవారు తమ స్థాయిని మర్చిపోవడమే దారుణం.

జాతీయ స్థాయిలో ‘పెద్దల సభ’ అయిన రాజ్యసభకు ప్రాతినిథ్యం వహిస్తోన్న విజయసాయిరెడ్డి, రాష్ట్ర స్థాయిలో పెద్దల సభ అయిన శాసనమండలికి ప్రాతినిథ్యం వహిస్తోన్న నారా లోకేష్‌ పెళ్ళి గురించి వివాదాస్పద వ్యాఖ్యలు చేయడం హాస్యాస్పదం కాక మరేమిటి.? గ్రామ వాలంటీర్లకు ప్రభుత్వం ప్రకటించిన 5 వేల రూపాయల గౌరవ వేతనంపై చాలా విమర్శలున్నాయి. వ్యవసాయ కూలీ కూడా హీనపక్షం ఏడెనిమిది వేల రూపాయలు సంపాదిస్తున్న రోజులివి. అలాంటిది, ఇంటింటికీ తిరిగి ప్రభుత్వ పథకాల పట్ల ప్రచారం చేసే వాలంటీర్లకు 5 వేల రూపాయల గౌరవ వేతనం చాలా చాలా తక్కువ.

Also Read: నారా లోకేష్‌ స్క్రిప్టు వెరీ గుడ్‌.. ఫేట్‌ వెరీ బ్యాడ్‌

విపక్షాలే కాదు, సాధారణ ప్రజల నుంచి ఈ 5 వేల రూపాయల గౌరవ వేతనంపై విమర్శలు వెల్లువెత్తుతున్నాయి. చంద్రబాబు, గ్రామ వాలంటీర్లపై విమర్శలు చేశారన్న అక్కసుతో, విజయసాయిరెడ్డి ఏకంగా నారా లోకేష్‌ పెళ్ళి విషయాన్ని ప్రస్తావించారు. అసమర్థుడు, మాలోకానికే పెళ్ళి అయినప్పుడు, వాలంటీర్లకు ఎందుకు పెళ్ళి అవదు.? అంటూ విజయసాయిరెడ్డి సోషల్‌ మీడియా వేదికగా ప్రశ్నించారు.

‘పంచ్‌’ అదిరిందిగానీ, కేవలం ఐదు వేల రూపాయల వేతనం పొందే గ్రామ వాలంటీర్‌కి పిల్లనిచ్చేందుకు ఎవరు ముందుకొస్తారన్న కనీస ఇంగీతాన్ని ఆయన మర్చిపోయారన్నది నిర్వివాదాంశం. నిరుద్యోగులకు ఉద్యోగ, ఉపాధి అవకాశాల్ని కల్పించాల్సిన బాధ్యత ప్రభుత్వం మీదనే వుంది. కానీ, పార్టీ కార్యకర్తల కోసం గ్రామ వాలంటీర్‌ పోస్టుల్ని క్రియేట్‌ చేసిన వైఎస్‌ జగన్‌ సర్కార్‌ తరఫున ఇంత దిగజారి ఎలా విజయసాయిరెడ్డి మాట్లాడగలుగుతున్నారు.?

విజయసాయిరెడ్డి కుటుంబీకులపై లోకేష్‌ కావొచ్చు, మరొకరు కావొచ్చు ఇలాంటి వ్యాఖ్యలు చేస్తేనో.! దురదృష్టవశాత్తూ విజయసాయిరెడ్డి ట్వీట్‌ కారణంగా, జగన్‌ కుటుంబ సభ్యులపై జుగుప్సాకరమైన కామెంట్స్‌, సోషల్‌ మీడియాలోని టీడీపీ సపోర్టర్స్ నుంచి వచ్చి పడుతున్నాయి.