గోరంట్ల లీక్స్: నాలుగ్గోడల మధ్య జరిగిన వ్యవహారమా.?

వైసీపీ ఎంపీ గోరంట్ల మాధవ్ న్యూడ్ వీడియో కాల్ వివాదం రోజు రోజుకీ ముదిరి పాకాన పడుతోంది. ఈ వివాదాన్ని ఎలాగైనా సైడ్ లైన్ చేసెయ్యాలని అధికార వైసీపీ విశ్వ ప్రయత్నాలూ చేస్తుండడం చూస్తోంటే, ‘న్యూడ్ వీడియో కాల్’ ఫేక్ కాదు, రియల్.. అనే అనుమానాలు రోజురోజుకీ బలపడుతున్నాయి.

తాజాగా, వైసీపీ ముఖ్య నేత.. ప్రభుత్వ సలహాదారు కూడా అయిన సజ్జల రామకృష్ణారెడ్డి, గోరంట్ల మాధవ్ న్యూడ్ వీడియో కాల్ వ్యవహారాన్ని నాలుగ్గోడల మధ్య జరిగిన వ్యవహారంగా అభివర్ణించారు. ‘ఒకవేళ అది జరిగి వుంటే.. అది నాలుగ్గోడల మధ్య జరిగిన వ్యవహారమే అవుతుంది.. లేదూ, అది మార్ఫింగ్ వ్యవహారమైనా అయి వుంటుంది.. చంద్రబాబు బాహాటంగా ఓటుకు నోటు కేసులో దొరికిపోయారు కదా..’ అంటూ సజ్జల రామకృష్ణారెడ్డి, తన తెలివినంతా ఉపయోగించి, గోరంట్ల లీకు వ్యవహారాన్ని కప్పిపుచ్చే ప్రయత్నం చేశారు.

ఓ ప్రభుత్వ సలహాదారుగా, ఆ నగ్న వీడియో కాల్ వెనుక నిజానిజాల్ని ప్రభుత్వం ఎంత సమయంలో బయటపెట్టగలదో సజ్జల రామకృష్ణారెడ్డికి తెలియదా.? ఈ కేసులో నిజా నిజాలు బయటకు తీసేందుకు ప్రభుత్వమెందుకు అలసత్వం ప్రదర్శిస్తోందో ఆయనకు అర్థం కావడంలేదా.? అర్థమయ్యీ, అన్నీ తెలీసీ ఆయన జనాన్ని మభ్యపెట్టే ప్రయత్నం చేస్తున్నారన్నది విపక్షాల విమర్శ.

నాలుగ్గోడల మధ్య వ్యవహారం కాదది. ఇద్దరు వ్యక్తులకు సంబంధించిన వ్యవహారం అసలే కాదది. గోరంట్ల మాధవ్ లక్షలాది మంది ప్రజలకు ప్రతినిధి. ఆయనకు లక్షలాది మంది ఓట్లేస్తే గెలిచారు, లోక్ సభకుఎంపికయ్యారు. హిందూపురం నియోజకవర్గ ఎంపీ.. ఆంధ్రప్రదేశ్ ఎంపీ.. లక్షలాది మంది నియోజకవర్గ ప్రజలకే కాదు, రాష్ట్ర ప్రజలకే కాదు.. దేశ ప్రజలందరికీ ఈ విషయమై గోరంట్ల మాధవ్ సమాధానం చెప్పాలి.

గోరంట్ల మాధవ్ మాత్రమే కాదు, వైఎస్సార్ కాంగ్రెస్ పార్టీ.. అలాగే రాష్ట్ర ప్రభుత్వం కూడా ఈ విషయమై రాష్ట్ర ప్రజలకీ, దేశ ప్రజలకీ వాస్తవాలేంటో వివరించి చెప్పగలగాలి. అది మానేసి, నాలుగ్గోడల మధ్య వ్యవహారమంటారేంటి.? అంటే, నాలుగ్గోడల మధ్య ఏం జరిగినా అది ‘లీగల్’ అని ప్రభుత్వ సలహాదారు చెప్పదలచుకున్నారా.? అన్నది సర్వత్రా వినిపిస్తోన్న విమర్శ.