బులుగు రాజ్యాంగం: వీటిని ప్రభుత్వ ఉద్యోగాలని అనగలమా.?

అధికార వైసీపీ పాలనలో, గౌరవ వేతనాలు పొందుతున్న వాలంటీర్లు కూడా ప్రభుత్వ ఉద్యోగులే. నమ్మాల్సిందే.. నమ్మి తీరాల్సిందే. లేకపోతే, పాలకులకు కోపమొస్తుంది. ప్రభుత్వ పెద్దలు నంది అంటే నంది.. అని ఒప్పుకోవాల్సిందే.. కాదు, పంది.. అనంటే.. ఔను అది పందే.. అని ఒప్పుకోవాలి. అసలు ప్రజల్ని ఏం చేయాలనుకుంటున్నారు పాలకులు.? అన్న ప్రశ్న జనబాహుళ్యంలో గట్టిగా వినిపిస్తున్నా, అధికార పార్టీ నేతలు మాత్రం జనం గొంతు నొక్కేస్తున్నారు అధికార మదంతో. లేకపోతే, వాలంటీర్లను ప్రభుత్వ ఉద్యోగులుగా ప్రభుత్వ ప్రకటనల్లో పేర్కొనడమేంటి.?

కొద్ది రోజుల క్రితమే, వాలంటీర్లు.. తమ వేతనాలు పెంచాలని ముఖ్యమంత్రికి లేఖ రాస్తే, ‘మీరు చేస్తున్నది ఉద్యోగం కాదు.. సేవ..’ అని స్పష్టం చేశారు ముఖ్యమంత్రి వైఎస్ జగన్ మోహన్ రెడ్డి. అలాంటప్పుడు, వాలంటీర్లు ప్రభుత్వ ఉద్యోగులెలా అవుతారు.? ముఖ్యమంత్రి చెప్పేదానికీ, ముఖ్యమంత్రి పేరుతో ప్రభుత్వ ప్రకటనల్లో పేర్కొన్నదానికీ పొంతన లేదంటే, వ్యవస్థలు.. ముఖ్యమంత్రిని లెక్క చేయని విధంగా పనిచేస్తున్నాయని అనుకోవాలా.? అన్న ప్రశ్న తలెత్తడం సహజమే కదా.

గడచిన రెండేళ్ళలో మొత్తం ఆరు లక్షలకు పైగా ఉద్యోగాలు కల్పించేశామని చెప్పుకుంది ప్రభుత్వం. ‘2019 జూన్ నుంచి ఇప్పటివరకు జగనన్న ప్రభుత్వం భర్తీ చేసిన ఉద్యోగాల వివరాలు’ అంటూ ఈ మొత్తం లెక్క చెప్పారు. ఆరు లక్షల ఉద్యోగాలలో, 2 లక్ష 59 వేల ఉద్యోగాలు వాలంటీర్లవే. కాగా, మొత్తం రెగ్యులర్ ఉద్యోగాలు ఒక లక్షా ఎనభై నాలుగు వేల 264గా ప్రభుత్వం పేర్కొంటోంది. కాంట్రాక్టు ఉద్యోగాలు 19,701. ఔట్ సోర్సింగ్ ఉద్యోగాలు 3,99,791. ఇందులో 2,59,585 మంది వాలంటీర్లు కావడం గమనార్హం.

ఇక, 2021-22 సంవత్సరానికిగాను 10,143 ఉద్యోగాల్ని కల్పించబోతోందట జగన్ ప్రభుత్వం. నేతి బీరకాయలో నెయ్యి చందాన.. ఉద్యోగాల కల్పన ప్రకటనలో.. అసలు సిసలు ఉద్యోగాలు ఎన్నో.. అన్న ఆవేదన ప్రజల్లో వ్యక్తమవుతోంది. ఔను, వాలంటీర్లవి ప్రభుత్వ ఉద్యోగాలే.. అని ఇప్పుడు జనం నమ్మాలేమో. ఒకవేళ వాలంటీర్లు, తమ వేతనాలు పెంచాలని అడిగితే మాత్రం.. మళ్ళీ అవి ‘సేవా కార్యక్రమాలు’గా మారిపోతాయ్. వినేవాడు వెర్రి వెంగళప్పలైతే.. చెప్పే కథలు ఇలాగే వుంటాయంటూ సోషల్ మీడియాలో ప్రభుత్వ తీరుపై సెటైర్లు పడుతున్నాయ్.