వీళ్ళంట.. ప్రజా ప్రతినిథులంట.. ఓటేస్తే పాపమే మరి.!

రాజకీయమంటే సేవ.. అనేది ఒకప్పటి మాట. రాజకీయం అంటే వ్యాపారమిప్పుడు. ఎన్నికల్లో గెలవడానికి ఎంత ఖర్చు చేశాం.? గెలిచాక ఎంత సంపాదించాం.? అన్న ప్రాతిపదికనే రాజకీయాలు నడుస్తున్నాయి. అందుకే, తమ ఆర్థిక మూలాలు దెబ్బతినకుండా వుండేందుకు రాజకీయ నాయకులు పార్టీ మారడం సర్వసాధారణమైపోయింది.. కాదు కాదు, అదొక జీవన్మరణ సమస్యగా మారిపోయింది రాజకీయ నాయకులకి.

కోడెల శివప్రసాద్ ఎందుకు ఆత్మహత్య చేసుకోవాల్సి వచ్చింది.? అన్న ప్రశ్నకు సరైన కారణం వెతికితే, మొత్తం పరిస్థితిపై స్పష్టత వచ్చేస్తుంది. సరే, ఆ విషయాన్ని పక్కన పెట్టేద్దాం. 2019 ఎన్నికలకు ముందు టీడీపీ ఎంపీలు కొందరు ఓ చోట సమావేశమై, ‘బరువు తగ్గాలనుకున్నవారు ప్రత్యేక హోదా కోసం నిరాహార దీక్ష చేస్తామని చెప్పండి..’ అంటూ జోకులేసుకున్న వైనం, వీడియో లీక్ రూపంలో బయటకొచ్చింది. అప్పట్లో ఆ వీడియో పెను దుమారం రేపింది.

ఈ మధ్యనే, ‘ఏప్రిల్ 17 తర్వాత పార్టీ లేదు బొక్కా లేదు..’ అంటూ టీడీపీ ఏపీ అధ్యక్షుడు కింజరాపు అచ్చెన్నాయుడు చేసిన వ్యాఖ్యల వ్యవహారం కూడా లీక్ రూపంలోనే బయటకొచ్చింది. ఇదీ రాజకీయ నాయకులకి, రాజకీయాలపైనా, ప్రజలపైనా వున్న చిత్తశుద్ధి. ఈసారి వైసీపీ నేతల వంతు. వైసీపీకి చెందిన పలువురు ప్రజా ప్రతినిథులు (ఎంపీలు) ఓ చోట కూర్చుని ముచ్చటించుకున్నారు. కరోనా విషయంలో తమ ప్రభుత్వం చేతులెత్తేసిన వైనాన్ని ఆ ఎంపీలు ఎంత చక్కగా ముచ్చటించుకున్నారో. ప్రభుత్వ అసమర్థత వల్లే రాష్ట్రంలో కరోనా కేసులు పెరిగిపోయాయని సదరు నేతలే ఒప్పుకున్నారు. అందులో వైసీపీ ముఖ్య నేత, మాజీ మంత్రి పిల్లి సుభాష్ చంద్రబోస్ తదితరులున్నారండోయ్. శవ రాజకీయాలు.. అని బహుశా ఇలాంటి రాజకీయాల గురించే చెప్పుకుంటారేమో.

మా ప్రభుత్వం కరోనా కట్టడిలో ఇతర రాష్ట్రాలకంటే మెరుగ్గా పనిచేస్తోందంటూ ప్రభుత్వ పెద్దలు ఘనంగా చెప్పుకుంటోంటే, పార్టీ ముఖ్య నేతలేమో ఇదిగో ఇలా తమ ప్రభుత్వ అసమర్థతను చాటేసుకుంటున్నారు. కోట్లు ఖర్చుపెట్టి రాజకీయాలు చేసేది, ప్రజల్ని ఏమార్చి, వంచించి.. తమ ఆర్థిక మూలాల్ని బలోపేతం చేసుకోడానికి తప్ప, ప్రజల్ని ఉద్ధరించడానికా.?