టీటీడీ భూముల అమ్మకాన్ని తప్పు పట్టిన వైసీపీ ఎంపీ!

టీటీడీ భూముల వేలం వ్యవహారం అధికార వైఎస్సార్‌ కాంగ్రెస్‌ పార్టీకి తలనొప్పిగా మారుతోంది. తమిళనాడులో వున్న భూముల్ని వేలం వేయడం ద్వారా సొమ్ము చేసుకోవాలన్న టీటీడీ ఆలోచనపై భక్తలోకం నుంచి తీవ్ర వ్యతిరేకత వ్యక్తమవుతోంది. గతంలో టీడీపీ హయాంలోనూ భూముల వేలం వ్యవహారం నడిచిందంటూ వైఎస్సార్‌ కాంగ్రెస్‌ పార్టీ బుకాయించొచ్చుగాక. కానీ, అధికార పార్టీకి చెందిన ఎంపీనే, టీటీడీ భూముల వేలం వ్యవహారంపై అసహనం వ్యక్తం చేస్తున్నారు.

‘దేవుడికి భక్తులు ఇచ్చిన భూములవి. అలా భూముల్ని దేవుడికి ఇవ్వడం వెనుక భక్తులకు కొన్ని సెంటిమెంట్లు వుంటాయి. డబ్బు వేరు.. భూమి వేరు.. ప్రభుత్వం ఈ విషయంలో హుందాతనంగా వ్యవహరించి వుండాల్సింది..’ అంటూ వైసీపీ ఎంపీ రఘురామకృష్ణంరాజు ఓ ఇంటర్వ్యూలో వ్యాఖ్యానించారు.

రాష్ట్రానికి కేంద్రం ద్వారా సహాయ సహకారాలు అందాలంటే, కేంద్రంలో అధికారంలో వున్న బీజేపీతో సఖ్యతగా వుండక తప్పదని రఘురామ కృష్ణంరాజు మరో ప్రశ్నకు సమాధానమిచ్చారు. గత కొంతకాలంగా వైసీపీలో రఘురామకృష్ణంరాజు వ్యవహార శౖలి పార్టీ అధిష్టానానికే అర్థం కాకుండా వుంది.

‘నేను ప్రస్తుతానికి వైఎస్సార్‌ కాంగ్రెస్‌ పార్టీ ఎంపీనే. అదే సమయంలో నాకు భారతీయ జనతా పార్టీతో సన్నిహిత సంబంధాలున్నాయి. నా వరకూ నేను నా నియోజకవర్గ ప్రజల కోసం, రాష్ట్రం కోసం అవసరమైనప్పుడల్లా కేంద్ర మంత్రుల్ని కలుస్తుంటాను. ఇందులో రాజకీయ పరమైన అంశాలకు తావు లేదు.. వైసీపీని నేను వీడబోవడంలేదు.. వీడాలన్న ఆలోచన కూడా లేదు. అయితే, సందర్భానుసారం నా అభిప్రాయాల్ని కుండబద్దలుగొట్టే స్వేచ్చ నాకుంది. ఆ విషయాన్ని పార్టీ అధిష్టానం కూడా అర్థం చేసుకుంటుందనే విశ్వసిస్తున్నాను..’ అంటూ రఘురామకృష్ణంరాజు చెబుతున్నారు.

ఇదిలా వుంటే, టీటీడీ భూముల అమ్మకం వ్యవహారం పెను దుమారం రేపుతోంది. వెంకన్న భూములపై రాజకీయ కుట్ర జరుగుతోందంటూ విపక్షాలు ఆరోపిస్తున్నాయి. వైఎస్‌ జగన్‌ ప్రభుత్వంపై ప్రత్యక్ష పోరుకి విపక్షాలు సిద్ధమవుతున్నాయి.