వైఎస్‌ జగన్‌కి రఘురామకృష్ణంరాజు లేఖాస్త్రం: ‘రామ’బాణం ఇదేనా.?

అన్న మాట ప్రకారం నర్సాపురం ఎంపీ రఘురామకృష్ణరాజు తమ పార్టీ అధినేత, ముఖ్యమంత్రి వైఎస్‌ జగన్‌ మోహన్‌రెడ్డికి ఓ లేఖ రాశారు. ‘వైఎస్సార్‌ కాంగ్రెస్‌ పార్టీ’ పేరుతో ఎంపీ విజయసాయిరెడ్డి ఇచ్చిన షోకాజ్‌ నోటీస్‌పై స్పందిస్తూ, ఈ ‘సమాధానాన్ని’ రఘురామకృష్ణరాజు, ముఖ్యమంత్రికి తనదైన స్టయిల్లో పంపించారు. ‘మన పార్టీ పేరుని వైఎస్సార్‌ కాంగ్రెస్‌ పార్టీ.. అని వాడకూడదని కేంద్ర ఎన్నికల సంఘం పేర్కొంది..’ అంటూ తన లేఖలో రఘురామకృష్ణరాజు ప్రస్తావించడం గమనార్హం.

‘కేంద్ర ఎన్నికల సంఘం వద్ద రిజిస్టర్‌ అయిన పేరుతో కాకుండా, వైఎస్సార్‌ కాంగ్రెస్‌ పార్టీ పేరుతో విజయసాయిరెడ్డి నాకు షోకాజ్‌ నోటీస్‌ ఇచ్చారు..’ అన్నది రఘురామకృష్ణరాజు లేఖలో పేర్కొన్న మరో కీలకమైన అంశం. క్రమశిక్షణా కమిటీ పార్టీలో వుందా.? లేదా.? అని కూడా ప్రశ్నించారు నర్సాపురం ఎంపీ.

‘నేనెక్కడా పార్టీకి వ్యతిరేకంగా మాట్లాడలేదు. మీ కోటరీ నాపై యాంటీ క్రిస్టియన్‌ అనే ముద్ర వేసింది.. పార్టీ అనుకూల మీడియాతో నాపై వ్యతిరేక కథనాలు రాయిస్తున్నారు..’ అంటూ సవివరంగా రఘురామకృష్ణంరాజు, ముఖ్యమంత్రి వైఎస్‌ జగన్‌కి రాసిన లేఖలో పేర్కొన్నారు. ‘మీరు సమయం ఇస్తే, అన్ని విషయాలూ మీతో చర్చించడానికి సిద్ధంగా వున్నాను..’ అని రఘురామకృష్ణంరాజు లేఖలో వైఎస్‌ జగన్‌ని కోరారు. మొత్తంగా ఆరు పేజీ లేఖను ముఖ్యమంత్రి వైఎస్‌ జగన్‌కి రఘురామకృష్ణంరాజు పంపించారు.

మరోపక్క, రఘురామకృష్ణంరాజు ఓ పాటని సోషల్‌ మీడియాలో విడుదల చేశారు. సినీ పరిశ్రమలో తనకు చాలామంది స్నేహితులున్నారనీ, ఓ మ్యూజిక్‌ డైరెక్టర్‌ రూపొందించిన ఆ పాట, ప్రధాని నరేంద్రమోడీకి చైనా యుద్ధం నేపథ్యంలో మద్దతుగా వుందే తప్ప, దీంట్లో రాజకీయమేమీ లేదన్నారు రఘురామకృష్ణరాజు. కాగా, ఈ పాటతో రఘురామ కృష్నంరాజు, బీజేపీకి మరింత దగ్గరవుతున్నారనే ప్రచారం జరుగుతోంది. ఢిల్లీలో ఎంపీలకు ఇచ్చిన విందు, ఇంగ్లీషు మీడియంపై పార్లమెంటులో వ్యక్తం చేసిన అభిప్రాయాలు, వైసీపీ అనుకూల మీడియాకి చెందిన ఓ వెబ్‌సైట్‌లో తనపై జుగుప్సాకరమైన కథనాలు, పార్టీ ఎమ్మెల్యేలు తనను దుర్భాషలాడడం, దిష్టిబొమ్మల్ని దహనం చేయడం.. ఇలా కీలకమైన అంశాల్ని రఘురామకృష్నంరాజు, జగన్‌కి పంపిన లేఖలో ప్రస్తావించడంతో.. ఈ లేఖపై జగన్‌ స్పందిస్తారా.? లేదా.? అన్నది ఆసక్తికరంగా మారింది.

అన్నట్టు, సీ-ఓటర్ సర్వేలో ఉత్తమ ముఖ్యమంత్రిగా నాలుగో స్థానం దక్కించుకున్న వైఎస్ జగన్, అతి త్వరలో మొదటి స్థానాన్ని దక్కించుకోవాలని ఆశిస్తున్నట్లు లేఖలో పేర్కొన్న రఘురామ కృష్నంరాజు తాను యువజన శ్రామిక రైతు కాంగ్రెస్ పార్టీ పట్ల ఎప్పటికీ విధేయుడిగా వుంటానని లేఖలో ప్రస్తావించడం మరో ఆసక్తికరమైన విశేషం.