రక్తం చిందిస్తున్న రైతు.. ఏంటీ పైశాచికత్వం.?

ఓ ఎంపీగారి కారు.. ఓ రైతుని ఢీకొట్టింది. ఈ క్రమంలో రైతు, సదరు ఎంపీగారి కారు కింద పడ్డాడు. అదృష్టవశాత్తూ ప్రాణం పోలేదు. కానీ, కాలికి మాత్రం తీవ్ర గాయమయ్యింది. సదరు ప్రజా ప్రతినిది¸, ఘటన జరిగిన సమయంలో కారులోనే వున్నారు. ప్రమాదం జరిగాక, కనీసం కారు దిగి.. సదరు రైతు పరిస్థితిని గమనించలేకపోయారు. ఇది అమరావతి పరిధిలో నిన్ననే జరిగింది. అయితే, చిత్రంగా అధికార పార్టీకి కొమ్ము కాసే మీడియా మాత్రం ‘ఎంపీపై దాడి..’ అంటూ పెద్ద హెడ్డింగ్‌ పెట్టి వ్యవహారాన్ని తప్పుదోవ పట్టించే ప్రయత్నం చేస్తోంది.

మొన్నామధ్య కూడా ఇలాంటి వైపరీత్యమే చోటు చేసుకుంది. ఎంపీని కొందరు యువకులు నిలదీస్తే, అలా నిలదీసినందుకు.. సదరు యువకులు జైలుకు వెళ్ళాల్సి వచ్చింది. దీన్ని ప్రజాస్వామ్యం అందామా.? రాజకీయాలు కులాల చుట్టూ తిరుగుతున్నాయి. ఈ క్రమంలో ఓ ప్రజా ప్రతినిది¸ని ఎవరన్నా నిలదీస్తే, దళితులపై దాడి అనో.. మహిళలపై దాడి అనో చిత్రీకరించడం.. సర్వసాధారణమైపోయింది. అక్కడ ఓ రైతు ప్రాణం పోయేది.

నిజానికి, ఇలాంటి సంఘటనలపై హత్యాయత్నం కేసు నమోదు చేయాలి. కానీ, అక్కడ గాయపడింది పేద రైతు. అందుక్కారణం.. అధికార పార్టీకి చెందిన ప్రజా ప్రతినిది¸. ఇంకేముంది.? పోలీసులు, హత్యాయత్నం కేసుని రైతు మీద పెట్టినా ఆశ్చర్యపోనక్కర్లేదు.

రాజధాని అమరావతిలో 69 రోజులుగా రైతుల ఆందోళనలు జరుగుతున్నాయి. ఉద్యమం చేస్తోన్నది రైతులు.. ఆ ఉద్యమానికి చాలా రాజకీయ పార్టీలు సంఘీభావం తెలిపాయి. అందులో టీడీపీ కూడా వుంది. ‘టీడీపీ గూండాలు.. ఎంపీపై దాడి చేశారు..’ అంటూ, రైతుల ఉద్యమాన్ని తక్కువ చేసి చూపే ప్రయత్నం చాలా తెలివిగా వైసీపీ చేస్తోంది. టీడీపీ గూండాలే ఆ దాడికి పాల్పడితే.. వారిని అదుపులోకి తీసుకోవచ్చుగాక.. కానీ, రైతు ఏం పాపం చేశాడని అతనిపైకి లారీలు ఎగబడుతున్నాయి.? అధికార పార్టీలకు చెందిన వాహనాలు దూసుకెళుతున్నాయి.?

ఏ జనంలోకి వెళ్ళి ‘ఒక్క ఛాన్స్‌ ప్లీజ్‌..’ అంటూ అధికారం దక్కించుకున్నారో.. ఇప్పుడు ఆ ప్రజలే రక్తం చిందిస్తున్నప్పుడు.. ముఖ్యమంత్రి ఏం చేస్తున్నట్లు.? బాధ్యత ఉండక్కర్లేదా.!