కాపు జనసేన కాదు, కమ్మ జనసేన.! వైసీపీ ‘చెత్త’ పల్లవి.!

జనసేన పార్టీని విమర్శిస్తున్నారో, ఆ పార్టీకి పొలిటికల్ మైలేజ్ ఇచ్చేందుకు అపరిపక్వ వ్యాఖ్యలు చేస్తున్నారోగానీ, ‘ఐటీ శాఖ మంత్రి’ పదవిని పక్కన పెట్టి, జనసేన పార్టీని విమర్శించే పదవిలో మాత్రం నూటికి నూరు శాతం బాగానే కష్టపడుతున్నారు వైసీపీ నేత, మంత్రి గుడివాడ అమర్నాథ్.

మొన్నామధ్యన ఏదో అధికారిక కార్యక్రమానికి వెళితే, ఈయనగార్ని గుడివాడ అమర్నాథ్ రెడ్డిగా అక్కడి నిర్వాహకులు పొరపాటున వ్యాఖ్యానించడంతో ఒకింత నొచ్చుకున్నారట. ఇదీ, ‘రెడ్డి’ ప్రభుత్వంలో నడుస్తున్న కథ.!

సరే, ఆ సంగతి పక్కన పెడితే, జనసేన పార్టీ మీద తాజాగా విమర్శలు చేసిన మంత్రి గుడివాడ అమర్నాథ్, ‘కాపు జనసేన కాదు.. కమ్మ జనసేన..’ అంటూ సంచలన వ్యాఖ్యలు చేశారు. ఇదెక్కడి చోద్యం.? రెడ్డి వైఎస్సార్ కాంగ్రెస్ పార్టీ, కమ్మ తెలుగు దేశం పార్టీ.. ఇలా వుంటాయా ఎక్కడైనా.? ఆమాత్రం ఇంగితం లేనోళ్ళు రాజకీయాల్లోకి వచ్చేయడమేంటి.? పైగా, మంత్రి పదవులు వెలగబెట్టడమేంటి.?

జనసేన వ్యవహారాల్ని నాదెండ్ల మనోహర్ చూసుకుంటున్నారు కాబట్టి, నాదెండ్ల మనోహర్ కమ్మ సామాజిక వర్గానికి చెందిన వ్యక్తి కాబట్టి.. జనసేన పార్టీ అనూహ్యంగా కమ్మ జనసేన పార్టీ అయిపోయింది మంత్రి గుడివాడ అమర్నాథ్ దృష్టిలో.

మరి, వైఎస్సార్ కాంగ్రెస్ పార్టీని ఏమని పిలవాలి.? కాపు వైఎస్సార్ కాంగ్రెస్ పార్టీ.. అనిగానీ, రెడ్డి వైఎస్సార్ కాంగ్రెస్ పార్టీ అనిగానీ అంటే దానికి గుడివాడ అమర్నాథ్ ఆమోద ముద్ర వేస్తారా.? వెయ్యరుగాక వెయ్యరు, వేస్తే ఏమవుతుందో.. తన పదవి వుంటుందో, ఊడుతుందో ఆయనకు బాగా తెలుసు.

జనసేన అధినేత పవన్ కళ్యాణ్ కాపు సామాజిక వర్గానికి చెందినవారు. ఇందులో రహస్యమేమీ లేదు. కానీ, ఆయనెప్పుడూ, ‘కాపు సామాజిక వర్గం అంతా నా వెంట రావాలి..’ అని అనలేదు. ఆయనలో ‘కాపు భావజాలం’ వుంటే, నాదెండ్ల మనోహర్‌కి ఎందుకు కీలక బాధ్యతలు అప్పగిస్తారు.?

‘ఆమాత్రం ఇంగితం వుంటే ఇకనేం.? ఏదో గాలి వాటంగా మంత్రి పదవి వచ్చేసిందంతే..’ అంటూ గుడివాడ అమర్నాథ్ మీద సెటైర్లు పడుతున్నాయ్. అన్నట్టు, విమర్శించే క్రమంలో జనసేనకు ఓ మేలు చేశారు గుడివాడ అమర్నాథ్. కాపు జనసేన మాత్రమే కాదు, కమ్మ జనసేన, దళిత జనసేన, రెడ్డి జనసేన.. ఇలా ఎవరైనా అభిమానంతో జనసేన పార్టీని ఎలాగైనా పిలుచుకోవచ్చు.

పవన్ కళ్యాణ్ కూడా ఇదే మాట చాలా సందర్భాల్లో చెప్పారు. ‘నేను కాపు సామాజిక వర్గానికి చెందినవాడ్ని అయినంతమాత్రాన కాపు సామాజిక వర్గం అంతా నా వెంటే నడుస్తుందనే భ్రమల్లో నేను లేను. అన్ని కులాల్నీ, మతాల్నీ సమానంగా గౌరవించేదే జనసేన పార్టీ..’ అని పదే పదే జనసేనాని చెబుతూ వస్తున్నారు.