ఉండవల్లిపై వైసీపీ నేతలు విరుచుకుపడలేదు ఎందుకబ్బా?

ఉండవల్లి అరుణ్ కుమార్.. రాజమండ్రి మాజీ ఎంపీగా, ముక్కుసూటిగా మాట్లాడే వ్యక్తిగా తెలుగు ప్రజలకు సుపరిచితులు. వైఎస్ హయాంలో మార్గదర్శి చిట్ ఫండ్ వ్యవహారాన్ని తెరపైకి తెచ్చి ఈనాడు అధినేత రామోజీరావును ఇబ్బందులు పెట్టింది ఈయనే. వైఎస్ తనయుడిగా జగన్ పై అభిమానం ప్రదర్శించిన ఉండవల్లి.. తాజాగా ఆయన పాలనలో లోటుపాట్లను ఏకిపారేశారు. రాజమండ్రిలో ప్రెస్ మీట్ పెట్టి ఏపీ సీఎంపై విరుచుకుపడ్డారు.

ప్రజలు అధికారం ఇచ్చింది ప్రత్యర్థులపై కక్ష సాధించడానికి కాదని స్పష్టంచేశారు. ప్రత్యర్థుల విషయంలో ఎలా వ్యవహరించాలో దక్షిణాఫ్రికా మాజీ అధ్యక్షుడు నెల్సన్ మండేలాను ఆదర్శంగా తీసుకోవాలని సూచించారు. వ్యవస్థలు, ప్రత్యర్థులపై శత్రుత్వం మంచిది కాదని.. వ్యవస్థలను మెరుగపరిచేలా పాలన ఉండాలని హితవు పలికారు. అందరూ ఎల్వీ సుబ్రమణ్యంలా ఉండరని.. నిమ్మగడ్డ, ఏబీ వెంకటేశ్వరరావులే ఎక్కువ ఉంటారని చురకలంటించారు. మద్యం విక్రయాల నుంచి ఆవ భూముల్లో అవకతవకల వరకు అన్ని అంశాలను ప్రస్తావించి జగన్ సర్కారును చెడుగుడు ఆడేశారు.

మమూలుగా అయితే, వైసీపీ నేతల నుంచి ఈపాటికి కౌంటర్ వచ్చేయాలి. తిట్లు, విమర్శలతో విరుచుకుపడిపోవాలి. కానీ ఉండవల్లి విమర్శలు సంధించి రెండు రోజులు అవుతున్నా ఒక్కరు కూడా స్పందించకపోవడం ఆశ్చర్యం కలిగిస్తోంది. అందులోనూ ఏపీ మంత్రుల భాష ఎలా ఉంటుందో అసలు చెప్పక్కర్లేదు. కానీ వైసీపీ నుంచి ఒక్క నేత కూడా ఉండవల్లిపై విరుచుకుపడలేదు.

ఇందుకు కారణం ఏమిటా అని ఆరా తీస్తే.. జగన్ నుంచి కచ్చితమైన ఆదేశాలు ఉండటమేనని తెలిసింది. ఉండవల్లిని ఎవరూ విమర్శించొద్దని మంత్రులు, ఎంపీలు, ఎమ్మెల్యేలు, పార్టీ నేతలు అందరికీ జగన్ స్పష్టంచేసినట్టు రాజకీయ వర్గాల్లో చర్చ జరుగుతోంది. ఉండవల్లి వ్యాఖ్యలు పట్టించుకోవద్దని, రాజకీయంగా ఎలాంటి విమర్శలూ చేయొద్దని సూచించినట్టు చెబుతున్నారు. ఒకవేళ ఆయన చెప్పిన విషయాల్లో మంచి సలహాలు ఏమైనా ఉంటే వాటి గురించి ఆలోచిద్దామని కూడా పేర్కొన్నట్టు సమాచారం. అందుకే ఉండవల్లిపై వైసీపీ తనదైన మార్కులో విరుచుకుపడలేదన్న మాట.