గడప గడపకీ నిలదీతలు.! జనంలో మార్పు వచ్చిందా.?

ఔను, గడప గడపకీ వెళుతున్న వైసీపీ ప్రజా ప్రతినిథులు చీవాట్లను తినాల్సి వస్తోంది. అంకెల గారడీ చేయడంలో దిట్ట అయిన, ఆర్థిక మంత్రి బుగ్గన రాజేంద్రనాథ్ రెడ్డికీ జనం నుంచి చీవాట్లు తప్పలేదు.

‘మేం మిమ్మల్ని ఉద్ధరించేస్తున్నాం కదమ్మా..’ అంటూ ఆర్థిక మంత్రి బుగ్గన రాజేంద్రనాథ్, ‘గడప గడపకీ మన ప్రభుత్వం’ కార్య్రకమంలో భాగంగా ఇంటికి వెళ్ళి ఓ మహిళతో వ్యాఖ్యానించగా, ఏంటి మీరు ఉద్ధరించేది.? మా డబ్బులు మాకిస్తున్నారు.. అంతే కదా.? అని నిలదీసిందా మహిళ.

‘98 వేల రూపాయల లబ్ది కలిగింది మీకు.. సంక్షేమ పథకాల రూపంలో..’ అని ఆర్థిక మంత్రి బుగ్గన రాజేంద్రనాథ్, తనదైన స్టయిల్లో లెక్కలు చెప్పే ప్రయత్నం చేశారు. ‘ఔను, లక్ష ఇస్తున్నారు.. కానీ, రెండు లక్షలు లాగేస్తున్నారు కదా.?’ అని సదరు మహిళ తెగేసి చెప్పింది.

దాంతో, ఆర్థిక మంత్రి బుగ్గన రాజేంద్రనాథ్‌కి మైండ్ బ్లాంక్ అయిపోయింది. ‘రోడ్లు వేశాం కదా.?’ అని వైసీపీకి చెందిన ఒకాయన బుకాయిస్తే, ‘ఆ రోడ్లతో మాకేం పని.?’ అంటూ సదరు మహిళ క్లాసు తీసుకోవడం గమనార్హం. ‘రోడ్లెలా వున్నాయో మాకు తెలియదా.?’ అని సదరు మహిళ మండిపడింది.

‘బటన్ నొక్కి నేరుగా లబ్ది దారుల ఖాతాల్లోకి సంక్షేమ పథకాలకు సంబంధించిన డబ్బులు వెళ్ళేలా చేస్తున్నాం..’ అంటూ ఘనంగా చెప్పుకుంటున్నారు ముఖ్యమంత్రి వైఎస్ జగన్ మోహన్ రెడ్డి. ‘ఇంత మేలు చేస్తున్నాం కాబట్టి, వచ్చే ఎన్నికల్లో 175కి 175 సీట్లూ మాకే రావాలి..’ అని కూడా చెబుతున్నారాయన.

కానీ, కింది స్థాయిలో పరిస్థితులు భిన్నంగా వున్నాయి. ఆఖరికి చెత్త పేరుతోనూ వసూళ్ళకు దిగుతోంది వైఎస్ జగన్ ప్రభుత్వం. ఇంతకన్నా దోపిడీ ఇంకేముంటుంది.? అని మహిళలే నిలదీస్తున్నారాయె. ‘చెత్త పన్ను’ తమ ప్రభుత్వమ్మీద ఎంతటి చెత్త ఇమేజ్ వేసిందో, వైసీపీ ఎమ్మెల్యే కొడాలి నాని ఈ మధ్య గుడివాడలో నిర్వహించిన ‘గడప గడపకూ’ కార్యక్రమంలోనే తేటతెల్లమైపోయింది.

సీఎం వైఎస్ జగన్ మోహన్ రెడ్డికి ఈ విషయం చెప్పి, చెత్త మీద పన్ను లేకుండా చేయాలని సాటి ఎమ్మెల్యే పేర్ని నానితో ఫోన్‌లో వాపోయారు కొడాలి నాని. చెత్త పన్ను వసూలు చేయొద్దని అధికారులకు కొడాలి నాని ఆదేశాలు కూడా జారీ చేశారు. ఆ చెత్త పన్ను.. ఆర్థిక మంత్రి బుగ్గన రాజేంద్రనాథ్‌ని కూడా తాజాగా ఇబ్బంది పెట్టింది.