‘కాపు’ సామాజిక వైసీపీ ‘కంపం’.! ఏం జరగబోతోంది.?

‘కాపు సామాజిక వర్గం ఎట్టి పరిస్థితుల్లోనూ పవన్ కళ్యాణ్ వెంట వెళ్ళకూడదు..’ అని అంటోంది వైసీపీ. వైసీపీ కాపు నేతలందరిదీ ఇదే మాట.! తెలుగుదేశం పార్టీ అధినేత నారా చంద్రబాబునాయుడు పంచన పవన్ కళ్యాణ్ చేరబోతున్నారన్నది వైసీపీ ఉవాచ.

రాజకీయాలన్నాక ఎత్తులు.. పైయెత్తులు వుంటాయ్.! టీడీపీ రాజగురువు రామోజీరావు దగ్గరకి వైఎస్ జగన్ మోహన్ రెడ్డి వెళ్ళొచ్చు.! కానీ, రాజజకీయ వ్యూహాల్లో భాగంగా టీడీపీ – జనసేన పార్టీల అధినేతలు కలవకూడదు. ఇదెక్కడి పంచాయితీ.? రామోజీరావు పంచన వైఎస్ జగన్ మోహన్ రెడ్డి గతంలో చేరారంటే దానర్థమేంటి.? చంద్రబాబు పంచన చేరినట్టే కదా.? అని జనసేన అంటోంది మరి.!

వైసీపీ నేత, మంత్రి గుడివాడ అమర్నాథ్ మరీ ప్రత్యేకంగా పవన్ కళ్యాణ్ మీద ‘కాపు’ విమర్శలు చేయడంలో దిట్ట. పేర్ని నాని సంగతి సరే సరి. గతంలో కన్నబాబు, అవంతి శ్రీనివాస్ తదితరులూ పవన్ కళ్యాణ్ మీద ఎగిరేవాళ్ళు. ఈ మధ్య ఎందుకో కన్నబాబు, అవంతి శ్రీనివాస్ తదితరులు సైలెంటయ్యారు. ఆ స్థానంలో దాడిశెట్టి రాజా, గుడివాడ అమర్నాథ్ చెలరేగిపోతున్నారు.

‘నేను వైఎస్ జగన్ మోహన్ రెడ్డికి పాలేరు లాంటోడినే..’ అని ఘనంగా చెప్పుకునే పేర్ని నాని గురించి ఇక్కడ ప్రస్తావించుకోవడం ఎంతవరకు సబబు.? అన్నది వేరే చర్చ.

ఓ సామాజిక వర్గం ఓ రాజకీయ పార్టీ వైపే గంపగుత్తగా వెళుతుందా.? అలాగైతే, కేవలం రెడ్డి సామాజిక వర్గం మాత్రమే.. వైఎస్సార్సీపీతో వుండాలి. కమ్మ సామాజిక వర్గం మాత్రమే టీడీపీతో వుండాలి. ఆ లెక్కన, కాపు సామాజిక వర్గం పూర్తిగా జనసేనతో వుండాలి కదా.?

వైసీపీ హయాంలో ముఖ్యమైన పదవులన్నీ (పార్టీ పరంగా, ప్రభుత్వం పరంగా) రెడ్డి సామాజిక వర్గానికే.! టీడీపీ హయాంలో కమ్మ సామాజిక వర్గానికే.! ఇది బహిరంగ రహస్యమన్నది కాపు సామాజిక వర్గం చేస్తోన్న ఆరోపణ. అందుకే, కాపు సామాజిక వర్గం ఈసారి జనసేన వైపు వుండాలనుకుంటోందట (అంటే, కాపు సామాజిక వర్గంలో మెజార్టీ భాగం అని).

ఇదే వైసీపీలో ప్రకంపనలు సృష్టిస్తోంది. ఆ కారణంగానే వైసీపీ నేతలు, కాపు సామాజిక వర్గంలో కుంపటి రాజేస్తున్నారు. ‘కాపు ముఖ్యమంత్రి’ అన్న ఆలోచననే వైసీపీ జీర్ణించుకోలేకపోతోంది. అందుకే, కాపు సామాజిక వర్గ నేతల్ని ముందెట్టి, పవన్ కళ్యాణ్ మీద అర్థం పర్థం లేని రాజకీయ విమర్శలు చేయిస్తోందన్నది చేగొండి హరిరామ జోగయ్య లాంటి కాపు ప్రముఖుల ఆవేదన.