బిగ్‌ ట్విస్ట్‌: వైసీపీలో ఆ చిల్లరగాళ్ళవరంటే.!

రాజకీయాల్లో ప్రత్యర్థులపై ‘చిల్లరగాళ్ళు’ అని విమర్శలు చేయడం సహజమే. కానీ, వైసీపీ నేతలే తమలో తాము ‘చిల్లరగాళ్ళు’ అని తిట్టుకుంటున్నారు. ఎమ్మెల్సీ పదవి పోతుందనో ఫ్రస్ట్రేషన్‌ వైసీపీ ముఖ్య నేతల్లో ఒకరైన ఇక్బాల్‌లో స్పష్టంగా కన్పిస్తోంది. హిందూపురంలో పార్టీ నేతలతో ప్రత్యేకంగా సమావేశమైన ఇక్బాల్‌, సొంత పార్టీ నేతలపైనే ‘చిల్లరగాళ్ళు’ అంటూ నోరు పారేసుకున్నారు.

ఇటీవలి ఎన్నికల్లో హిందూపురం నుంచి పోటీ చేసిన ఇక్బాల్‌, టీడీపీ అభ్యర్థి చేతిలో ఓడిపోయిన విషయం విదితమే. అయితే, తన ఓటమికి సొంత పార్టీ కార్యకర్తలే కారణమంటూ ఇక్బాల్‌ ఆవేదన వ్యక్తం చేస్తున్నారు గత కొంతకాలంగా. మరోపక్క, ఇక్బాల్‌కి వ్యతిరేకంగా మరో గ్రూపు హిందూపురం నియోజకవర్గ వైసీపీలో షురూ అయ్యింది. ఈ గ్రూప్‌పై ఎప్పటికప్పుడు ఇక్బాల్‌, అధిష్టానానికి ఫిర్యాదు చేస్తూనే వున్నా, అధిష్టానం నుంచి మాత్రం ఇక్బాల్‌కి తగిన స్థాయిలో మద్దతు లభించడంలేదు. ఆ అసహనాన్ని తాజాగా ఇక్బాల్‌ వెల్లడించారు.

‘గతంలో వైఎస్‌ జగన్‌నీ, షర్మిలనీ బూతులు తిట్టినోళ్ళు.. చిల్లరగాళ్ళు ఇప్పుడు పార్టీని భ్రష్టుపట్టించడానికి ప్రయత్నిస్తున్నారు..’ అంటూ వాపోయారాయన. ఇక్బాల్‌ ఒక్కరే కాదు, పార్టీలో ‘చిల్లరగాళ్ళపై’ చాలామంది వైసీపీ నేతలు ఆయా నియోజకవర్గాల్లో అసహనంతో ఊగిపోతున్నారు. ఆ లిస్ట్‌లో నెల్లూరు జిల్లాకి చెందిన వైసీపీ ముఖ్య నేత నల్లపురెడ్డి ప్రసన్నకుమార్‌రెడ్డి కూడా ఒకరు. ఈ ఇద్దరే కాదు, ఇంకా ఇలాంటోళ్ళు చాలామందే వున్నారట.

సాక్షాత్తూ మంత్రి బొత్స సత్యనారాయణ, మరో మంత్రి అవంతి శ్రీనివాస్‌పైనా.. ఈ తరహా ఆరోపణలు గత కొంతకాలంగా విన్పిస్తుండడం గమనార్హం. ‘మండలి రద్దుకి ముందు పరిస్థితి ఇలా వుంది. మండలి నిజంగానే రద్దయితే.. పార్టీలో అంతర్గత కుమ్ములాటలు తారాస్థాయికి చేయడం ఖాయం..’ అని వైసీపీ వర్గాల నుంచే మీడియాకి లీకులు అందుతున్నాయి. కాగా, రాజోలు నియోజకవర్గంలోనూ పార్టీ రెండుగా విడిపోయింది. అక్కడ పరిస్థితిని చక్కదిద్దేందుకు మంత్రులు రంగంలోకి దిగాల్సి వచ్చింది. మొత్తమ్మీద, వైసీపీలో ‘చిల్లరగాళ్ళ’ వ్యవహారం, పార్టీ పుట్టి ముంచేలా వుందన్నమాట.