వైసీపీ మార్కు కరెంట్ షాక్.. టీడీపీ సౌజన్యంతో.!

నవ్విపోదురుగాక మనకేటి.? అన్నట్టు తయారైంది ఆంధ్రప్రదేశ్ రాష్ట్రంలో వైసీపీ, టీడీపీ ఆడుతున్న డబుల్ గేమ్ తీరు. రాష్ట్రంలో విద్యుత్ ఛార్జీలు పెరిగాయి. ‘ట్రూ అప్’ పేరుతో విద్యుత్ వినియోగదారులకు వాత పెడుతోంది వైఎస్ జగన్ సర్కార్. అబ్బే, ఈ వాత 2022 మార్చి వరకు మాత్రమేనని అధికారులు వివరణ ఇస్తున్నారు.

ఇంధన ఛార్జీల పెరుగుదల వల్లనే ట్రూ అప్ పేరుతో విద్యుత్ ఛార్జీలను తాత్కాలికంగా పెంచాల్సి వస్తుందని ఇంధన శాఖ కార్యదర్శి నాగులాపల్లి శ్రీకాంత్ వెల్లడించారు. మరోపక్క, ప్రభుత్వ సలహాదారు సజ్జల రామకృష్ణారెడ్డి మాత్రం, చంద్రబాబు సర్కార్ అనుసరించిన అస్తవ్యస్థ విధానాల వల్లనే విద్యుత్ ఛార్జీలను పెంచాల్సి వస్తోందని చెబుతున్నారు.

ఇంతకీ, ఇంధన శాఖ కార్యదర్శి చెప్పింది నిజమా.? ప్రభుత్వ సలహాదారు సజ్జల రామకృష్ణారెడ్డి చెప్పింది నిజమా.? సెప్టెంబర్ 2021 నుంచి మార్చి 2022 వరకు ఛార్జీల తాత్కాలిక పెంపు.. అంటే ఆషామాషీ వ్యవహారం కాదు. ఆ తర్వాత ఈ ట్రూ అప్ ఛార్జీల వడ్డన వుండదని ఇంధన శాఖ కార్యదర్శి చెబుతున్నా, ఆ తర్వాత పరిస్థితులు ఎలా వుంటాయో ఇప్పుడే ఊహించలేం.

వైఎస్ జగన్ హయాంలో అన్ని ధరలూ పెరిగిపోతున్నాయి.. రేట్లు ఆకాశాన్నంటున్నాయి.. విద్యుత్ ఛార్జీలు సైతం సామాన్యుడికి పెను భారంగా మారుతున్నాయనే విమర్శలున్నాయి. ప్రభుత్వాన్ని ప్రజలు నిలదీసే ఏ సమస్య వచ్చిపడినా, చంద్రబాబు పాలన మీదకి నెపాన్ని నెట్టేయడం అలవాటైపోయింది వైఎస్సార్ కాంగ్రెస్ పార్టీకి. మరోపక్క, తమ హయాంలో వైఫల్యాలను ప్రస్తావించకుండా, ప్రస్తుత ప్రభుత్వంపై అడ్డగోలుగా దుమ్మత్తి పోయడంలో తెలుగుదేశం పార్టీ తనదైన ప్రత్యేకతను చాటుకుంటోంది.

రెండు పార్టీలూ కలిసి రాష్ట్ర ప్రజల్ని తప్పుదోవపట్టిస్తున్న వైనం స్పష్టంగా కనిపిస్తోందిక్కడ. అవకాశం వున్న చోటల్లా బాదుడు పద్ధతికి తెరలేపుతూ, జనం జేబలుకు చిల్లుపెడుతున్న జగన్ సర్కార్.. ఇంకోపక్క, రాష్ట్ర ఆర్థిక పరిస్థితి బాగాలేదంటే అప్పుల కోసం వెంపర్లాడుతున్న తీరు చూస్తోంటే, భవిష్యత్తులో రాష్ట్ర ప్రజల నెత్తిన వివిధ రకాల ఛార్జీల భారం, ధరల భారం మరింత పెరగనుందే తప్ప, తగే అవకాశమే లేదన్నది స్పష్టంగా కనిపిస్తోంది.