మండలిపై పట్టు సాధించిన వైసీపీ: మండలి రద్దు హుళక్కేనా.?

శాసన మండలి రద్దు.. అనేది ఆవేశంతో తీసుకున్న అనాలోచిత నిర్ణయం కానే కాదంటూ కొన్నాళ్ళ క్రితం శాసన సభ సాక్షిగా ముఖ్యమంత్రి వైఎస్ జగన్ మోహన్ రెడ్డి సహా పలువురు మంత్రులు, అధికార పార్టీకి చెందిన శాసన సభ్యులు సెలవిచ్చారు. శాసన మండలి నిర్వహణ అనేది ఖర్చు దండగ వ్యవహారంగా వైసీపీ పేర్కొంది. అందుకే, శాసన మండలిని రద్దు చేయాలనుకుంటున్నట్లు వెల్లడించింది. ఈ మేరకు శాసన సభలో శాసన మండలి రద్దుపై తీర్మానం కూడా చేసిన వైసీపీ ప్రభుత్వం, ఆ తీర్మానాన్ని కేంద్రానికి పంపించింది.

అప్పట్లో శాసన మండలి రద్దుకి వైఎస్ జగన్ ప్రభుత్వం నిర్ణయం తీసుకోవడం వెనుక బలమైన కారణం వుంది. అదే, శాసన మండలిలో వైసీపీ ప్రభుత్వం తన పంతాన్ని నెగ్గించుకోలేకపోవడం. సంఖ్యా పరంగా చూసుకుంటే అప్పటికి శాసన మండలిలో వైసీపీ కంటే టీడీపీ బలమైన స్థానంలో వుంది. అదే వైసీపీకి కంటగింపుగా మారింది. కానీ, ఇప్పుడు పరిస్థితులు మారాయి. శాసన మండలిలో టీడీపీ బలం తగ్గి, వైసీపీ బలం పెరిగింది. దాంతో, ఇకపై శాసన మండలిలో వైసీపీకి ఎలాంటి సమస్యలూ వుండకపోవచ్చు.

నిజానికి, రాష్ట్ర స్థాయిలో శాసన మండలి, జాతీయ స్థాయిలో రాజ్యసభ.. రాజకీయ నిరుద్యోగులకు పునరావాస కేంద్రం.. అన్న విమర్శలున్నాయి. నిజానికి రాజ్యసభ పరిస్థితి వేరు. రాష్ట్రాల స్థాయిలో శాసన మండలిని మరీ పాతాళానికి దిగజార్చేశారు.. గౌరవం పరంగా.. అన్ని రాజకీయ పార్టీలకూ ఈ పైత్యంలో వాటా వుంది. అందుకే, దేశంలో కొన్ని రాష్ట్రాలు శాసన మండలిని కలిగి లేవు.. శాసన మండలి పెట్టాలన్న ఆలోచన కూడా ఆ రాష్ట్రాల్లో లేవు.

ఇక, ఇప్పుడు ఏం జరగబోతోంది.? కేంద్రం వద్ద పెండింగులో వున్న శాసన మండలి రద్దు అంశం గనుక ముందుకు కదిలితే, వైసీపీ పరిస్థితేంటి.? ఇలా చాలా ప్రశ్నలున్నాయి. సమయం చూసి వైసీపీని దెబ్బ కొట్టాలనుకుంటే, బీజేపీకి అది చిటికెలో పని. అలా చేస్తే, రాజకీయంగా వైసీపీ చాలా గట్టి దెబ్బ తినేయాల్సి వస్తుంది. కానీ, అప్పట్లో ఆవేశంతో రద్దుపై నిర్ణయం తీసుకున్న జగన్ సర్కార్, ఆ తర్వాత ఆలోచన మార్చుకుందనీ, అదే విషయాన్ని కేంద్ర ప్రభుత్వ పెద్దల ముందు పెట్టడం జరిగిందనీ.. శాసన మండలి రద్దయ్యే అవకాశం లేదనీ రాజకీయ వర్గాల్లో గుసగుసలు వినిపిస్తున్నాయి.