వైసీపీని అడిగి మరీ తన్నించుకుంటున్న టీడీపీ!

ఎలాగోలా తిరిగి ఆంధ్రప్రదేశ్‌లో అధికారం చేజిక్కించుకోవాలని తెలుగుదేశం పార్టీ తహతహలాడుతోంది. అధికారం సంగతి తర్వాత.. కనీసం టీడీపీ 2024 ఎన్నికల్లో తన ఉనికిని అయినా చాటుకునే పరిస్థితి వుంటుందా.? అన్నది తెలుగు తమ్ముళ్ళలో వ్యక్తమవుతోన్న ఆందోళన. కింది స్థాయిలో పార్టీ క్యాడర్‌ ఏమనుకుంటుందో చంద్రబాబుకి అనవసరం. ‘40 ఇయర్స్‌ ఇండస్ట్రీ’ అని చెప్పుకుని తిరుగుతుంటారు టీడీపీ అధినేత, మాజీ ముఖ్యమంత్రి నారా చంద్రబాబునాయుడు.

ఈ క్రమంలో చంద్రబాబు, తనకు అనుకూలమైన మీడియాని అడ్డగోలుగా వాడేయడం ఎన్నో ఏళ్ళుగా చూస్తూనే వున్నాం. మొన్న కియా, ఇప్పుడేమో.. విశాఖ మిలీనియం టవర్స్‌ – ఇండియన్‌ నేవీ విధానం.. అక్కడ ఏం జరుగుతోందన్నదానిపై స్పష్టత వుండదుగానీ.. టీడీపీ నేతలు మీడియా ముందుకొచ్చి యాగీ చేసేస్తుంటారు. కియా ఎపిసోడ్‌లో ఆల్రెడీ టీడీపీకి దిమ్మత తిరిగి బ్లాంక్‌ అయ్యింది. ఇప్పుడేమో, ‘మిలీనియం టవర్స్‌ విషయంలో ఇండియన్‌ నేవీ, జగన్‌ సర్కార్‌కి షాకిచ్చింది..’ అని టీడీపీ నేతలు యాగీ చేస్తే, ‘అంతా ఉత్తదే’ అని సాక్షాత్తూ ఇండియన్‌ నేవీ తేల్చి చెప్పేసింది.. దాంతో మరోమారు తల బొప్పి కట్టింది టీడీపీకి.

టీడీపీ – వైసీపీ కలిసి ఆడుతున్న డ్రామానా.? లేదంటే, రెండు పార్టీల మధ్యా నిజంగానే వైరం వుందా.? అన్నది రాష్ట్ర ప్రజలకు అర్థం కావడంలేదు. అవును మరి, వైఎస్‌ జగన్‌ సర్కార్‌.. నానా రకాలుగా టీడీపీని ఇరకాటంలో పెట్టేందుకు ప్రయత్నిస్తోంది. అయితే, అవన్నీ మాటలకే పరిమితమవుతున్నాయి. చేతల్లో ఏమీ కన్పించడంలేదు. ‘నువ్వు తన్నినట్లు నటించు.. నేను ఏడ్చినట్లు నటిస్తా..’ అన్నట్లుంది వ్యవహారం.

ఈ అడిగి తన్నించుకునే ఆటని టీడీపీ ఎన్నాళ్ళు ఆడుతుందో.. టీడీపీ అడగ్గానే తన్నినట్లు నటించే నాటకం వైసీపీ ఎన్నాళ్ళు ఆడుతుందోగానీ.. ఇద్దరూ కలిసి రాష్ట్రాన్ని భ్రష్టుపట్టిస్తున్నారన్నది నిర్వివాదాంశం. కియా ఎపిసోడ్‌తో రాష్ట్రం పరువు పోయింది. ఇప్పుడేమో, ఇండియన్‌ నేవీ దృష్టిలోనూ రాష్ట్రంలోని రాజకీయం అభాసుపాలయ్యింది. కానీ, అధికారపక్షం, ప్రతిపక్షం.. ‘నవ్విపోదురుగాక మనకేటి.?’ అన్నట్లు వ్యవహరిస్తున్నాయి. వైఎస్‌ జగన్‌ ముఖ్యమంత్రి అయి 9 నెలలు పూర్తి కావొస్తోంది.. రాష్ట్రంలో కొత్తగా ఒక్కటంటే ఒక్క పరిశ్రమ ఏర్పాటు కాలేదాయె. ఇదీ రాష్ట్రంలో అభివృద్ధి.