వైఎస్ జగన్ వెటకారమట.. అచ్చెన్న సెటైరేశారట.!

పెట్రో మంటలు.. రోడ్లపై ప్రమాదకరమైన రీతిలో గుంతలు.. ఇంకోపక్క భారీ వర్షాలతో వరదలు.. ఇంతేనా.? చాలా సమస్యలున్నాయి రాష్ట్రంలో. కానీ, అసెంబ్లీ సమావేశాల నేపథ్యంలో జరిగిన బీఏసీ సమావేశంలో.. ముఖ్యమంత్రి వైఎస్ జగన్ మోహన్ రెడ్డి, టీడీపీ నేత అచ్చెన్నాయుడి మీద వెటకారం చేశారట.. ‘పెద్దాయన’ అంటూ.!

‘చంద్రబాబు సొంత నియోజకవర్గం కుప్పంలో మేం గెలిచాం.. ఇప్పుడు ఆయన మొహం ఎలా వుందో చూడాలనుకుంటున్నాం..’ అంటూ ‘పెద్దాయన’ అచ్చెన్నతో చెప్పారట వైఎస్ జగన్ మోహన్ రెడ్డి. అందుకు అచ్చెన్న ఇచ్చిన సమాధానమేంటో తెలుసా.? ‘ఎలా గెలిచారో మీ అంతరాత్మకి తెలుసు..’ అని.

నిజమేనా.? ముఖ్యమంత్రి వైఎస్ జగన్, ప్రధాన ప్రతిపక్షానికి చెందిన సీనియర్ ఎమ్మెల్యే అచ్చెన్నాయుడు మధ్య ఈ చర్చ జరిగి వుంటుందా.? జరిగే వుండొచ్చుగాక.!

రాజకీయాల్లో గెలుపోటములు సహజం. ఇప్పుడు వైఎస్ జగన్ వెక్కరిస్తే, రేప్పొద్దున్న చంద్రబాబు కూడా వెక్కిరించే పరిస్థితి రావొచ్చు. అన్నట్టు, గతంలో చంద్రబాబు కూడా ఇలాగే వెక్కిరించారండోయ్. రాజకీయాలు ఎంతలా దిగజారిపోయాయో చెప్పడానికి ఇదొక నిదర్శనం మాత్రమే.

రాష్ట్రంలో ప్రజలెదుర్కొంటున్న సమస్యలు ఎవరికీ పట్టడంలేదు. గుంతలమయమైన రోడ్లను బాగు చేసేందుకు, ‘ఇదిగో నిధుల విడుదల.. అదిగో టెండర్లు ఖరారు..’ అంటూ వైఎస్ జగన్ సర్కార్ పబ్లిసిటీ స్టంట్లు చేస్తోంది. పెట్రో ధరల మంట విషయంలో అసలు తమకేమీ పట్టనట్టు వ్యవహరిస్తోంది జగన్ ప్రభుత్వం.

అంతేనా, ప్రత్యేక హోదా సహా రాష్ట్రానికి కేంద్రం విభజన సమయంలో ఇచ్చిన హామీల విషయమై.. రాష్ట్రంలో అధికారంలో వున్నవారికి అప్పుడూ, ఇప్పుడూ.. ఎప్పుడూ చిత్తశుద్ధి కనిపించడంలేదు. రాజధాని ఏంటో తెలియని రాష్ట్రంలో అసెంబ్లీ సమావేశాలట.. అదీ స్మశానంగా, ఎడారిగా అభివర్ణించబడుతున్న అమరావతిలో.

ప్రజలేమనుకుంటున్నారన్న సోయ లేకుండా రాజకీయ పార్టీలు, నాయకులు వ్యవహరిస్తుండడమే రాష్ట్రం ఈ దుస్థితిని ఎదుర్కోవడానికి కారణం.