చేతులెత్తేసిన జగన్‌.. ఈ నెలలోనే స్థానిక ఎన్నికలు.!

రిజర్వేషన్ల కోటా 59.85 శాతానికి పెంచితే, కోర్టు మొట్టికాయలు తప్పవని తెలిసే ఆంధ్రప్రదేశ్‌లో వైఎస్‌ జగన్‌ ప్రభుత్వం స్థానిక ఎన్నికల ప్రక్రియకు శ్రీకారం చుట్టింది. కోర్టు మొట్టికాయలేసింది.. రిజర్వేషన్లను 50 శాతానికే పరిమితం చేయాల్సి వస్తోంది. ఈ పాపాన్ని తెలివిగా టీడీపీ మీదకు నెట్టేసే ప్రయత్నం చేసింది అధికార వైఎస్సార్సీపీ. ‘బీసీల మీద చిత్తశుద్ధి వుంటే, సుప్రీంకోర్టుకు వెళ్ళాలి..’ అని ఉచిత సలహాలిస్తున్న టీడీపీ ఎందుకు ఆ పని చేయడంలేదు.? అంటే, అదే మరి రాజకీయం. ఈ విషయంలో టీడీపీనీ, వైసీపీనీ ఒకే గాటన కట్టిపడేయాలేమో. ఇద్దరికీ రాజకీయ లబ్ది మాత్రమే కావాలి.. తప్ప, బీసీల మీద ఇద్దరికీ చిత్తశుద్ధి లేదన్నది నిర్వివాదాంశం.

ఇక, రిజర్వేషన్లపై కోర్టుకు వెళ్ళే ఉద్దేశ్యం ప్రభుత్వానికి లేదని తేలిపోయింది. ఎందుకంటే, స్వయానా ముఖ్యమంత్రి వైఎస్‌ జగన్‌ మోహన్‌రెడ్డి, స్థానిక ఎన్నికలు ఈ నెలలోనే పూర్తి చేసెయ్యాలంటూ అధికారులకు దిశా నిర్దేశం చేసేశారు. అవును మరి, ఒకవేళ ఈ నెలలో స్థానిక ఎన్నికలు పూర్తి చేయకపోతే, కేంద్రం నుంచి ఆయా పథకాల కింద రాష్ట్రానికి రావాల్సిన సుమారు 5 వేల కోట్ల నిధులు గల్లంతయిపోతాయి. అందుకే, స్థానిక ఎన్నికల కోసం వైఎస్‌ జగన్‌ మోహన్‌రెడ్డి ప్రభుత్వం తొందరపడుతోంది. ఈ తొందరేదో గతంలోనే పడి వుంటే, ఇప్పుడు ఈ దుస్థితి వచ్చేదే కాదు.

రిజర్వేషన్ల వ్యవహారంపై వైసీపీ – టీడీపీ మధ్య ఇంకా వివాదాలు, విమర్శలు కొనసాగుతూనే వున్నాయి. రిజర్వేషన్లను అడ్డుకునేందుకు టీడీపీ కుట్ర పన్నిందని వైసీపీ ఆరోపిస్తోంటే, ఆ కుట్రకు తెరలేపాకే.. ప్రజల్ని మభ్యపెడుతూ 59.85 శాతం రిజర్వేషన్లను జగన్‌ ప్రభుత్వం ఖారారు చేసిందని టీడీపీ ఎద్దేవా చేస్తోంది. మొత్తమ్మీద, స్థానిక ఎన్నికలకు ముందే రెండు ప్రధాన రాజకీయ పార్టీల బండారం బయటపడిపోయింది. ఇప్పుడిక నిర్ణయం తీసుకోవాల్సింది ఓటర్లే. స్థానిక ఎన్నికల్లో ఎటూ అధికార పార్టీకే ఎడ్జ్‌ వుంటుంది గానీ.. ఆ ఎడ్జ్‌ మీద ఈ ‘బీసీ నాటకం’ తాలూకు ఎఫెక్ట్‌ ఏమైనా పడుతుందా.? అన్నది వేచి చూడాల్సిందే.