అలా ‘చెప్పుకునే ధైర్యం’ వైఎస్ జగన్ మోహన్ రెడ్డికే లేదు కదా.?

ఆంధ్రప్రదేశ్ ముఖ్యమంత్రి వైఎస్ జగన్ మోహన్ రెడ్డి, తాను ఏం మాట్లాడినా జనం గుడ్డిగా నమ్మేస్తారనే భ్రమల్లో వున్నారు. లేకపోతే, గడచిన మూడేళ్ళలో రాష్ట్రాన్ని ఉద్ధరించేశామని ఆయన ఎలా చెప్పగలుగుతారు.?

రాష్ట్రానికి జీవనాడి అయిన పోలవరం ప్రాజెక్టు పరిస్థితేంటి.? అన్నదానిపై సంబంధిత శాఖ మంత్రికే ఏమీ తెలియదాయె. ఆ శాఖకు సంబంధించిన మాజీ మంత్రి, ‘నన్ను ఆ విషయం అడగొద్దు..’ అని మంత్రి పదవి పోగానే సెలవిచ్చారాయె.! ఇదీ ఆంధ్రప్రదేశ్ రాష్ట్రాన్ని వైఎస్ జగన్ సర్కారు ఉద్ధరించేసిన వైనం.

రాజధాని అమరావతిని మంత్రులే స్మశానం, ఎడారిగా అభివర్ణించారు. ఇదీ గడచిన మూడేళ్ళలో వైఎస్ జగన్ సర్కారు సాధించిన అభివృద్ధి. తాత్కాలికమో, ఇంకొకటో.. చంద్రబాబు హయాంలో అమరావతి అనే ప్రాంతం రాజధానిగా ప్రకటితమయ్యింది.. అక్కడ కొన్ని నిర్మాణాలు పూర్తయ్యాయి. కొన్ని నిర్మాణాలు పూర్తయ్యే దశలో వున్నాయి.. కొన్ని ప్రారంభ దశలో వున్నాయి.

ముఖ్యమంత్రి అయ్యాక.. మూడేళ్ళలో రాజధాని అమరావతికి సంబంధించి ఒక్క ఇటుకు మక్కనైనా అమరావతిలో వైఎస్ జగన్ మోహన్ రెడ్డి అదనంగా పెట్టించగలిగారా.? అన్న విపక్షాల ప్రశ్నకు ఆయన ఏం సమాధానం చెప్పగలరు.?

పోనీ, మూడు రాజధానులన్నారు. అందులో ఒకటి అమరావతి కదా.? సరే, అమరావతిని పక్కన పెట్టేశారు.. మిగతా రెండు రాజధానుల సంగతేంటి.? గతంలో తీసుకొచ్చిన మూడు రాజధానుల చట్టాన్ని, తమ స్వహస్తాలతో రద్దు చేశారు.. అసెంబ్లీలో తాము పెట్టిన బిల్లుని వెనక్కి తీసుకున్నారు.

కొత్త చట్టం తెస్తామని చెప్పి కూడా నెలలు గడుస్తోంది. ఏదీ మూడు రాజధానుల చట్టం.? ఏం చెబుతారు ఈ విషయమై రాష్ట్ర ప్రజలకి.? చంద్రబాబు హయాంలో రాష్ట్రం ఎలా ఉద్ధరణకు గురయ్యిందో దత్త పుత్రుడు పవన్ కళ్యాణ్ చెప్పగలరా.? అని ముఖ్యమంత్రి నిలదీసేస్తున్నారు.

అసలు ఆంధ్రప్రదేశ్ ప్రజలు టీడీపీని ఓడించిందే, టీడీపీ చెప్పిన అభివృద్ధి చేయలేదని.! దానికీ, పవన్ కళ్యాణ్‌కీ ఏంటి సంబంధమో, అసలెందుకు చంద్రబాబుకీ, పవన్ కళ్యాణ్‌కీ మధ్య లేని సంబంధాన్ని బలవంతంగా సృష్టించే ప్రయత్నం వైఎస్ జగన్ మోహన్ రెడ్డి చేస్తున్నారో.!

చంద్రబాబు నుంచి ఏ ప్యాకేజీ తీసుకుని వైసీపీ, పవన్ కళ్యాణ్‌ని ఆ అక్రమ సంబంధాన్ని అంటగట్టేందుకు ప్రయత్నిస్తోందో వైసీపీ అధినేతగా వైఎస్ జగన్ మోహన్ రెడ్డి సమాధానం చెబితే బావుంటుందేమో.!