జస్ట్ ఆస్కింగ్: అప్పు దొరికింది.. అంతే కదా.?

మూల ధన వ్యయంలో ఆంధ్రప్రదేశ్ అత్యుత్తమ ప్రగతి.. అంటూ వైసీపీ అనుకూల మీడియా బీభత్సమైన ప్రచారానికి తెరలేపింది. కేంద్రం, రాష్ట్రానికి అదనపు అప్పులు చేసుకోనీయకుండా హెచ్చరికలు చేస్తోందంటూ విపక్షాలు చేస్తున్న దుష్ప్రచారానికి చెక్ పెడుతూ, తాజాగా రాష్ట్రం 2,655 కోట్లు రుణం సమకూర్చుకునేందుకు అనుమతిచ్చిందన్నది వైసీపీ, వైసీపీ అనుకూల మీడియా చెబుతోన్న విషయం.

రాష్ట్రం ఇప్పుడున్న పరిస్థితుల్లో అప్పు పుట్టడం గగనంగా తయారైంది. అప్పుల మీద అప్పులు.. కుప్పలు తెప్పలుగా అప్పులు.. ఎడా పెడా అప్పులు.. ఆంధ్రప్రదేశ్ గురించి ఇంతకన్నా భిన్నంగా చెప్పుకోవడానికి ఏమీ లేదు.

గడచిన రెండున్నరేళ్ళుగా రాష్ట్రంలో అభివృద్ధి నీరసించింది.. అప్పులేమో కనీ వినీ ఎరుగని రీతిలో పెరిగిపోతున్నాయి. ‘చంద్రబాబు హయాంలో తీసుకున్న అప్పులకు వడ్డీలు చెల్లించాల్సిన బాధ్యత మామీద పడింది..’ అంటూ వైసీపీ పదే పదే చంద్రబాబు పేరుని ప్రస్తావిస్తోంది.

అంతకు ముందు చంద్రబాబు కూడా ఇదే మాట చెప్పారు. రాష్ట్రాన్ని తాను అభివృద్ధి చేస్తే, కాంగ్రెస్ పార్టీ రాష్ట్రాన్ని అప్పుల్లోకి నెట్టేసిందని చంద్రబాబు సెలవిచ్చారు. మరి, ఇప్పుడు వైసీపీ చేస్తున్న అప్పుల మాటేమిటి.? దానికి వడ్డీలు కట్టాల్సిందెవరు.? అసలు అప్పు తీర్చాల్సిందెవరు.? భవిష్యత్తులో ఎవరు అధికారంలోకి వచ్చినా, అంతకు మించి అప్పులు చేయాలి తప్ప, రాష్ట్రాన్ని అభివృద్ధి చేయడానికి ఆస్కారమే వుండదు.

అప్పు ఎంత ప్రమాదకరమో ఆంధ్రప్రదేశ్ రాష్ట్రాన్ని చూస్తే అర్థమవుతోందన్న చర్చ సర్వత్రా జరుగుతోంది. ఇలాంటి పరిస్థితుల్లో కొత్త అప్పు దొరికిందని పండగ చేసుకోవడమేంటి.? కేంద్రం ఏ నిబంధన పెట్టినా, దానికి ఆంధ్రప్రదేశ్ ప్రభుత్వం గుడ్డిగా తలూపుతుండడంతో.. రాష్ట్రానికి సరికొత్తగా అప్పులు చేసుకునే వెసులుబాటు కలుగుతోంది.

సంక్షేమ పథకాల రూపంలో ప్రజలకే ఆ సొమ్ముని అందిస్తున్నామని వైఎస్ జగన్ ప్రభుత్వం చెబుతోంది. కానీ, దాని వల్ల ప్రయోజనమేంటి.? అభివృద్ధికి ఆస్కారం లేకుండా చేస్తూ, ప్రజలను సోమరిపోతుల్లా మార్చతున్న ప్రభుత్వ విధానాలే రాష్ట్రానికి పెను శాపం.