అధికారులపై అక్కసు.. వైఎస్‌ జగన్‌ సర్కార్‌కి మొట్టికాయలు.!

సీనియర్‌ అధికారులపై వైఎస్‌ జగన్‌ ప్రభుత్వం అసహనంతో ఊగిపోతోందా.? అంటే, ‘అవును’ అని చెప్పడానికి ఇటీవలి కాలంలో చాలా సంఘటనల్ని ఉదాహరణలుగా చెప్పొచ్చేమో. వైఎస్‌ జగన్‌ మోహన్‌రెడ్డికి అత్యంత సన్నిహితుడిగా పేరొందిన సీనియర్‌ ఐఏఎస్‌ అధికారి ఎల్వీ సుబ్రహ్మణ్యంను అతి కొద్ది కాలంగానే వైఎస్‌ జగన్‌ ప్రభుత్వం ‘పక్కన’ పెట్టింది. చీఫ్‌ సెక్రెటరీగా పనిచేసిన ఆయనపై బాహాటంగా ఆరోపణలు అయితే చేయలేదుగానీ, అత్యంత అవమానకరంగా ఆయనపై బదిలీ వేటు వేసింది వైఎస్‌ జగన్‌ ప్రభుత్వం. అప్పట్లో ఈ విషయమై నానా యాగీ జరిగింది.

మరోపక్క, సీనియర్‌ ఐఆర్‌ఎస్‌ అధికారి జాస్తి కృష్ణ కిషోర్‌పై అయితే ఏకంగా సస్పెన్షన్‌ వేటు వేసింది. ఈ మధ్యనే సీనియర్‌ ఐపీఎస్‌ అధికారి ఏబీ వెంకటేశ్వరరావుపైనా అనేక ఆరోపణలు చేస్తూ, సస్పెన్షన్‌ వేటు వేసిన విషయం విదితమే. కాగా, తనపై పడ్డ సస్పెన్షన్‌ వేటుని జాస్తి కృష్ణ కిషోర్‌, సెంట్రల్‌ అడ్మినిస్ట్రేటివ్‌ ట్రైబ్యునల్‌లో సవాల్‌ చేశారు. విచారణ సందర్భంగా రాష్ట్ర ప్రభుత్వానికి మొట్టికాయలు పడినట్లు ప్రచారం జరుగుతోంది. జాస్తి కృష్ణ కిషోర్‌, కేంద్ర సర్వీసులకు వెళ్ళేందుకు క్యాట్‌ అనుమతివ్వడమే ఇందుకు నిదర్శనం.

మరోపక్క, ఏబీ వెంకటేశ్వరరావు విషయంలో కూడా వైఎస్‌ జగన్‌ ప్రభుత్వానికి మొట్టికాయలు తప్పేలా లేవు. చంద్రబాబు హయాంలో ఏబీ వెంకటేశ్వరరావు, ఇంటెలిజెన్స్‌ హెడ్‌గా బాధ్యతలు నిర్వహించిన విషయం విదితమే. ఎన్నికల సమయంలో ఏబీ వెంకటేశ్వరరావుపై బదిలీ వేటు పడింది. అప్పటినుంచి ఇప్పటిదాకా ఆయనకు రాష్ట్ర ప్రభుత్వం వేతనం చెల్లించకపోవడం గమనార్హం. ఈ విషయమై ఏబీ వెంకటేశ్వరరావు ఇప్పటికే క్యాట్‌ని ఆశ్రయించిన విషయం విదితమే. ఏదిఏమైనా అధికారుల విషయంలో ప్రభుత్వాలు అత్యుత్సాహంతో తీసుకునే చర్యలు ఇలాగే బెడిసి కొడుతుంటాయి. అయినాగానీ, ప్రభుత్వాల తీరు మారడంలేదు.

రాజకీయ కక్ష సాధింపులకి ‘అధికారం’ భలేగా ఉపయోగపడ్తోందిగానీ, పదే పదే మొట్టికాయలు వేయించుకోవడం ప్రభుత్వాధినేతలకు అస్సలేమాత్రం మంచిది కాదు. సస్పెండ్‌ అవడం ద్వారా సదరు అధికారుల ఇమేజ్‌కి కొంత డ్యామేజ్‌ అయ్యే అవకాశం లేకపోలేదు. అదే సమయంలో, క్యాట్‌ని ఆశ్రయించి ఉపశమనం పొందితే మాత్రం.. అది ఆయా అధికారులకు, ఆయా ప్రభుత్వాలపై సాధించిన ఘనవిజయంగానే పరిగణించాల్సి వస్తుంది.