ప్రజల ప్రాణాలకంటే ‘ఇంగ్లీషు మీడియం’ ముఖ్యమా.?

మే నెల 3వ తేదీతో లాక్‌డౌన్‌ ముగియాల్సి వుంది. ముగుస్తుందా.? లేదా.? అన్నది వేరే చర్చ. నిజానికి, ఏప్రిల్‌ 14 తర్వాత దేశంలో లాక్‌డౌన్‌ ఎత్తివేయాల్సి వుంది. కానీ, అది జరగలేదు. కారణం అందరికీ తెల్సిందే. దాంతో, మే 3 తర్వాత లాక్‌డౌన్‌ ఎత్తివేస్తారనే ‘ఆశ’ ఎవరికీ లేదు. అలా ఎత్తేస్తే అది అత్యంత ప్రమాదకర పరిస్థితులకు కారణమవుతుందనే అభిప్రాయాలు నిపుణుల నుంచి వ్యక్తమవుతున్నాయి.

ఇదిలా వుంటే, వైఎస్‌ జగన్‌ సర్కార్‌ మాత్రం, ప్రజల ప్రాణాల పట్ల కనీసపాటి బాధ్యత కూడా లేకుండా తన ‘రాజకీయం’ తాను చేసుకుంటూ పోతోంది. హైకోర్టు మొట్టికాయలు వేసినా, ఇంగ్లీషు మీడియం విషయంలో తమ మొండితనం వీడేందుకు సుముఖత వ్యక్తం చేయడంలేదు వైఎస్‌ జగన్‌ సర్కార్‌. తాజాగా విద్యార్థుల తల్లిదండ్రుల అభిప్రాయణ సేకరణ కోసం ప్రయత్నాలు షురూ చేసింది. ఈ సమయంలో ఇది అవసరమా.? అని రాష్ట్ర ప్రజానీకం ముక్కున వేలేసుకుంటున్నారు. ‘గ్రామ వాలంటీర్లు వున్నారు కదా.. అది కష్టమైన ప్రక్రియ కాదు..’ అని అధికార పార్టీ నేతలు చెబుతుండడం గమనార్హం.

నిజమే, అభిప్రాయ సేకరణ అనేది కష్టమైన వ్యవహారం కాదు. కానీ, దానికంటూ ఓ సమయం – సందర్భం అవసరం కదా.! నవ్విపోదురుగాక మనకేటి.? అన్నట్లుంది వ్యవహారం. గ్రామ వాలంటీర్లకు ఆరోగ్య భద్రత కల్పించడం మంచిదేగానీ, వాళ్ళే కరోనా వైరస్‌ వాహకాలుగా మారే పరిస్థితి వస్తే..? వారి ప్రాణాల్ని సైతం పణంగా పెట్టి రాజకీయం నడుపుతోంది వైఎస్‌ జగన్‌ సర్కార్‌.

జూన్‌లో స్కూళ్ళు తెరుచుకోవాల్సి వుంది. కానీ, కరోనా వైరస్‌ – ప్రపంచ పరిణామాలు చూశాక, ఈ ఏడాది విద్యా సంవత్సరంపై చాలామంది చాలా రకాల అనుమానాలు వ్యక్తం చేస్తున్నారు.

అయినా, వైఎస్‌ జగన్‌ సర్కార్‌కి ఎందుకీ మొండితనం.? హైకోర్టులో మొట్టికాయలు పడ్డాక కూడా, అడ్డదారులు వెతుక్కోవడంలో ఆంతర్యమేమిటి.? ఇంగ్లీషు మీడియం వద్దని ఎవరూ చెప్పడంలేదు. కానీ, ఇంగ్లీషు మీడియం పేరుతో, తెలుగు మీడియం అనేదే లేకుండా చేయాలన్న ‘కుట్ర’నే ఇప్పుడంతా ప్రశ్నిస్తున్నారు.

మొట్టికాయలు అలవాటైపోయాయ్‌ గనుక మరోసారి ఇదే విషయమై న్యాయస్థానాలు చీవాట్లు పెట్టినా ఫర్లేదనే కోణంలో జగన్‌ సర్కార్‌ అత్యుత్సాహం ప్రదర్శిస్తోందని అనుకోవాలా.?