ఏపీ రాజ్యసభకి తెలంగాణ రంగు: ఆ ఇద్దరూ ఏపీ తరఫున నిలబడతారా.?

ఆంధ్రప్రదేశ్ నుంచి నాలుగు రాజ్యసభ సీట్లు ఖాళీ అవుతున్నాయ్. అవన్నీ వైఎస్సార్ కాంగ్రెస్ పార్టీకే దక్కబోతున్నాయ్. ఆ నాలుగు సీట్లకు సంబంధించి అధికార వైసీపీ అభ్యర్థుల్ని ఖరారు చేసింది. అందులో ఇద్దరు బీసీలు కాగా, ఇద్దరు రెడ్డి సామాజిక వర్గానికి చెందినవారు. పైగా, అందులో ఒకరు బీసీ ఉద్యమ నేత ఆర్.కృష్ణయ్య.

చిత్రమేంటంటే, ఆర్.కృష్ణయ్య తెలంగాణకు చెందినవారు. గతంలో టీడీపీ తరఫున తెలంగాణ ముఖ్యమంత్రి అభ్యర్థిగా ప్రాచుర్యంలోకి వచ్చారు.. ఆ ఆమేజ్‌తోనే ఎన్నికల్లో పోటీ చేసి ఓడిపోయారు కూడా. తెలంగాణకే చెందిన నిరంజన్ రెడ్డిని కూడా రాజ్యసభకు పంపుతోంది ఏపీలోని అధికార పార్టీ. ఆ నిరంజన్ రెడ్డి ఎవరో కాదు, మ్యాటినీ ఎంటర్టైన్మెంట్ సంస్థ అధినేత నిరంజన్ రెడ్డి. ఈయన ప్రముఖ న్యాయవాది.

వైసీపీ రాజ్యసభ సభ్యుడు, ఆ పార్టీ జాతీయ ప్రధాన కార్యదర్శి విజయసాయిరెడ్డికి మరోమారు రాజ్యసభకు వెళ్ళే అవకాశం దక్కింది. మిగిలిన వ్యక్తి బీద మస్తాన్ రావు. ఆయనకు బీసీ కోటాలో అవకాశం దక్కిందన్నది వైసీపీ వాదన.

అంతా బాగానే వుందిగానీ, ఆంధ్రప్రదేశ్ నుంచి బీసీ ఉద్యమ నేతలెవరూ లేరా.? బీసీ వర్గాలకు చెందిన నాయకులు వైసీపీలో లేరా.? తెలంగాణకు చెందిన ఆర్.కృష్ణయ్యను ఎందుకు వైసీపీ తరఫున ఏపీ నుంచి రాజ్యసభకు పంపుతున్నట్లు.? ఇదేమీ మిలియన్ డాలర్ల ప్రశ్న కాదు. ఆర్.కృష్ణయ్య ద్వారా ఏపీలో బీసీ ఓటు బ్యాంకుని ‘పదిలం’ చేసుకోవాలన్నది వైసీపీ అధినేత వైఎస్ జగన్ వ్యూహం.

అంతేనా, తెలంగాణ మీద కొత్తగా వైసీపీ అధినేతకు ఆశలేమైనా వున్నాయా.? లేకపోతే, తెలంగాణ నుంచి ఏకంగా ఇద్దర్ని ఆంధ్రప్రదేశ్ కోటాలో రాజ్యసభకు వైఎస్ జగన్ ఎందుకు పంపిస్తున్నట్లు.? సరే, వైసీపీ అధినేతగా ఎవరికి టిక్కెట్లు ఇవ్వాలన్నది వైఎస్ జగన్ ఇష్టం.

కానీ, రాజ్యసభలో ఒకవేళ ఆంధ్రప్రదేశ్ తరఫున విభజన సమస్యలపైనో, ప్రత్యేక హోదాపైనో, ఇరు తెలుగు రాష్ట్రాల మధ్య పంచాయితీ విషయమ్మీదనో మాట్లాడాల్సి వస్తే, ఆర్ కృష్ణయ్య కావొచ్చు.. నిరంజన్ రెడ్డి కావొచ్చు ఎవరి తరఫున నిలబడతారు.? ఆంధ్రప్రదేశ్ తరఫునా.? తెలంగాణ తరఫునా.?

ఈ ప్రశ్నకు వైసీపీ సమాధానమివ్వాల్సి వుంది.. ఆ సమాధానం కోసం ఆంధ్రప్రదేశ్ ప్రజలు ఆసక్తిగా ఎదురుచూస్తున్నారు.