స్వర్గీయ వైఎస్ రాజశేఖర్ రెడ్డి విషయంలో పేటెంట్ హక్కులు ముగ్గురికే వున్నాయ్. ఒకరేమో వైఎస్ జగన్ మోహన్ రెడ్డి.. ఇంకొకరు వైఎస్ విజయమ్మ.. మరొకరు వైఎస్ షర్మిల. వైఎస్ జగన్ మోహన్ రెడ్డి ప్రస్తుతం ఆంధ్రప్రదేశ్ ముఖ్యమంత్రి. వైఎస్ విజయమ్మ పరిస్థితేంటి.? ఆమె జస్ట్ మాజీ ఎమ్మెల్యే మాత్రమే. పైగా మాజీ వైసీపీ నేత కూడా.! వైసీపీ గౌరవాధ్యక్ష పదవికి కొన్నాళ్ళ క్రితమే ఆమె రాజీనామా చేశారు. కాదు కాదు.. బలవంతంగా ఆమెతో రాజీనామా చేయించారు. ఇక వైఎస్ షర్మిల, తెలంగాణలో రాజకీయాలు చేస్తున్నారు.
హెల్త్ యూనివర్సిటీకి వున్న ఎన్టీయార్ పేరు మార్చేసి, వైఎస్సార్ పేరు పెట్టడం పట్ల వైఎస్ జగన్ మోహన్ రెడ్డి కుటుంబంలోనే అభ్యంతరాలు వ్యక్తమవుతున్నాయి. ‘అలా ఎలా పేరు మార్చుతారు.?’ అంటూ వైఎస్ షర్మిల ప్రశ్నిస్తున్నారు. ‘ఎన్టీయార్ కోట్లాదిమంది ప్రజల అభిమానం పొందిన నాయకుడు. ఆయన పేరు మార్చడమేంటి.? వైఎస్సార్ ఆత్మ ఈ విషయాన్ని హర్షించదు. వైఎస్సార్ పేరుని ఇప్పుడు పెట్టినా, రేప్పొద్దున్న ఇంకొకరు ఆ పేరు మార్చేందుకు మనమే అవకాశం ఇచ్చినట్లయ్యింది..’ అంటూ అన్న వైఎస్ జగన్ మోహన్ రెడ్డిని ఉద్దేశించి కీలక వ్యాఖ్యలు చేశారు వైఎస్ షర్మిల.
అలా పేరు మార్చడమంటే ఆయా నాయకుల్ని అవమానించడమే అవుతుంది. ఇప్పుడు ఎన్టీయార్కి అవమానం జరిగితే, రేప్పొద్దున్న వైఎస్సార్కి అవమానం జరుగుతందన్నది షర్మిల వాదన.
‘అదిగో, చెల్లి కూడా వైఎస్ జగన్ ఆలోచనని మెచ్చలేదు. ఇంకెందుకు ముఖ్యమంత్రి పదవిలో వుండడం.? ఇంతకన్నా అవమానకరం ఇంకేముంటుంది.?’ అంటూ వైఎస్ జగన్ మోహన్ రెడ్డి మీద సోషల్ మీడియా వేదికగా సెటైర్లు పడుతున్నాయి. ఇలాంటి విషయాల్లో మాత్రం వైఎస్ జగన్ అస్సలు మడమ తిప్పరు. సీపీఎస్ రద్దు లాంటి విషయాల్లో మడమ తిప్పినట్లుగా.. ఇలాంటి సందర్భాల్లోనే నిజానికి మడమ తిప్పాలి. తప్పదు.!
అసలు పేరులో ఏముంది.? ఇంకా నయ్యం.. ఆ మాత్రం ఇంగితం పాలకులకు వుంటే, తమ పేర్లు.. తమ కుటుంబ సభ్యుల పేర్లను సంక్షేమ పథకాలకు ఏ పాలకుడైనా ఎందుకు పెడతాడు.?
‘మేం తీసుకుంటున్న నిర్ణయాల్ని అందరూ హర్షిస్తున్నారు..’ అంటూ వైసీపీ నేతలు బహు గొప్పగా చెప్పుకుంటుంటారు. ఎక్కడ.? వైఎస్ వివేకానందరెడ్డి హత్య కేసుకు సంబంధించి అన్న హయాంలో వున్న ఆంధ్రప్రదేశ్ ప్రభుత్వాన్ని నమ్మడంలేదు సునీతా రెడ్డి. వైఎస్ జగన్ మోహన్ రెడ్డి నడుపుతున్న పార్టీని నమ్మడంలేదు ఆయన తల్లి వైఎస్ విజయమ్మ. అన్న తీసుకున్న హెల్త్ యూనివర్సిటీ పేరు మార్పు నిర్ణయాన్ని సమర్థించడంలేదు సొంత చెల్లి షర్మిల.!
వైఎస్ జగన్ జైలుకు వెళ్ళినప్పుడు వైఎస్ విజయమ్మ రాజకీయం చేసి వుండకపోతే.. షర్మిల పాదయాత్ర చేసి వుండకపోతే.. వైఎస్సార్ కాంగ్రెస్ పార్టీ నిలబడేదా.?