ప్చ్.. జగన్ ఏడాది ఆనందం అలా ఆవిరైపోయింది.!

వైఎస్సార్ కాంగ్రెస్ పార్టీ ఏపీలో గెలుపొంది శనివారం నాటికి సరిగ్గా ఏడాది పూర్తయింది. అయితే, ఏడాది ఆనందం ప్రస్తుతం ఆ పార్టీకి అంతగా లేదు. అది ఏ కరోనా కారణంగా అనుకుంటే పొరపాటే. కరోనా ఉన్నా.. లాక్ డౌన్ ఉన్నా రాష్ట్రంలో అటూ ఇటూ తిరగడానికి, ట్రాక్టర్లతో ర్యాలీలు చేయడానికి అధికార పార్టీలకు అడ్డేముంది? అలాగే వేడుకలు కూడా ఓ రేంజ్ లో నిర్వహించేవారు. కానీ అధికార పార్టీకి ఏపీ హైకోర్టులో వరుసగా తగులుతున్న ఎదురుదెబ్బలు ఊపిరి సలపనివ్వడంలేదు. ఇప్పటికే 50కి పైగా విషయాల్లో కోర్టులో వ్యతిరేక తీర్పులు చవిచూసిన జగన్ సర్కారుకు తాజాగా ఒకేరోజు మూడు అంశాల్లో ఎదురుదెబ్బ తగిలింది.

దీంతో సీఎం జగన్ తీవ్ర అసహనంతో ఉన్నట్టు సమాచారం. ప్రభుత్వ కార్యాలయాలకు వైసీపీ జెండా రంగులు వేయడమే కాకుండా దానికి పాడిపంటల కలరింగ్ ఇవ్వడాన్ని హైకోర్టు తీవ్రంగా ఆక్షేపించింది. కోర్టుతో ఆటలాడొద్దని హెచ్చిరిస్తూ.. సదరు జీవోను కొట్టివేసింది. అలాగే ఐపీఎస్ అధికారి ఏబీ వెంకటేశ్వరరావుపై సస్పెన్షన్ ఎత్తివేసింది. విశాఖ డాక్టర్ సుధాకర్ అరెస్టు వ్యవహారంపై దర్యాప్తు బాధ్యతను సీబీఐకి అప్పగించింది. ఇలా ఒకేరోజు న్యాయస్థానంలో మూడు ఎదురుదెబ్బలు తగిలేసరికి సీఎం జగన్ తీవ్ర అసహనం, అసంతృప్తి వ్యక్తంచేసినట్టు సమాచారం.

ఈ అంశంపై శనివారం కొంతమంది పార్టీ ముఖ్యులతో చర్చించిన ఆయన.. ప్రభుత్వ లీగల్ టీం మార్చే అంశంపై సమాలోచనలు జరిపినట్టు తెలుస్తోంది. లీగల్ టీం సమర్థంగా లేకపోవడం వల్లే కోర్టులో ప్రతి విషయంలోనూ వ్యతిరేకత వస్తుందనే అభిప్రాయం కొంతకాలంగా పార్టీలో సాగుతోంది. తాజాగా జగన్ ఇదే అంశంపై చర్చించినట్టు చెబుతున్నారు. ముఖ్యంగా వెంకటేశ్వరరావు సస్పెన్షన్ ఎత్తివేత విషయాన్ని జగన్ సర్కారు తీవ్రంగా పరిగణిస్తోంది. దీనిపై సుప్రీంకోర్టుకు వెళ్లాలని నిర్ణయించినట్టు సమాచారం. మొత్తానికి ఎంతో కొంత సంబరంగా జరగాల్సిన వైసీపీ ఏడాది వేడుకలపై హైకోర్టు నీళ్లు పోసినట్టయింది.