మెగాస్టార్ చిరంజీవిపై బులుగు పచ్చ అసహనం.!

మెగాస్టార్ చిరంజీవి చేసిన నేరమేంటి.? వైసీపీ అనుకూల మీడియా, టీడీపీ అనుకూల మీడియా.. అదేనండీ, బులుగు మీడియా.. అలాగే పచ్చ మీడియా.. ఎందుకు చిరంజీవి మీద విషం చిమ్ముతున్నట్టు.?

ప్రధాని నరేంద్ర మోడీ పాల్గొన్న మన్యం వీరుడు అల్లూరి సీతారామరాజు విగ్రహావిష్కరణ సభలో చిరంజీవికి అవమానం జరిగిందట. అదెలాంటి అవమానమో ఏమో, ఎవరికీ అర్థం కావడంలేదు. చిరంజీవి, నరేంద్ర మోడీ.. రాజకీయ మంతనాలు చేశారట.. అవెలాంటి మంతనాలో ఎవరికీ అర్థం కావడంలేదు.

బులుగు పచ్చ మీడియా మాత్రం ఎవరికి తోచిన రీతిలో రోత రాతలు రాసేస్తూనే వున్నాయి. మెగాస్టార్ చిరంజీవికి, ప్రత్యేక గౌరవం వైసీపీ ఇచ్చిందట. వైసీపీ ప్రభుత్వం, ప్రత్యేకంగా చిరంజీవిని ఈ కార్యక్రమానికి ఆహ్వానించిందట. అలాగని వైసీపీ నేత ఒకరు ఓ న్యూస్ ఛానల్ చర్చా కార్యక్రమంలో సెలవిచ్చేశారు.

నిజానికి, భీమవరంలో జరిగిన అల్లూరి విగ్రహావిష్కరణ కార్యక్రమం పూర్తిగా ప్రైవేటు వ్యవహారం. క్షత్రియ సేవా సమితి విగ్రహాన్ని ఏర్పాటు చేసి, ప్రధానినీ, ముఖ్యమంత్రినీ ఆహ్వానించింది. ఈ క్రమంలో బీజేపీ అనూహ్యంగా ఈ కార్యక్రమాన్ని తమకు అనుకూలంగా మార్చుకుంది. కేంద్ర మంత్రి కిషన్ రెడ్డి రంగంలోకి దిగారు. ఇంకోపక్క, రాష్ట్ర ప్రభుత్వం కూడా ఈ కార్యక్రమాన్ని తమకు అనుకూలంగా మార్చుకుంది. వైసీపీ చేయాల్సినంత హంగామా చేసేసింది.

రాజకీయాలకతీతంగా జరగాల్సిన కార్యక్రమం, రాజకీయ హంగామా నడుమ నడిచింది. వేదిక మీదనే మంత్రి రోజా, ప్రధాని నరేంద్ర మోడీతో సెల్ఫీ కోసం ఆరాటపడటం.. ఈ కార్యక్రమం మీద వైసీపీ సర్కారుకి వున్న చిత్తశుద్ధిని చెప్పకనే చెబుతోంది.

ఇక, చిరంజీవిని ఆహ్వానించింది కేంద్ర మంత్రి కిషన్ రెడ్డి. రాష్ట్ర ప్రభుత్వం, ప్రత్యేకంగా చిరంజీవిని ఆహ్వానించిందని చెప్పడానికి రుజువులేమైనా వున్నాయా.? లేవాయె.!

అటు బీజేపీ, ఇటు వైసీపీ.. చిరంజీవి పేరు చెప్పి రాజకీయ లబ్ది పొందాలని చూస్తున్నమాట వాస్తవం. దీన్ని టీడీపీ తట్టుకోలేక, తన అనుకూల మీడియా ద్వారా చిరంజీవి మీద విషం చిమ్మే ప్రయత్నం చేస్తోంది. అద్గదీ అసలు సంగతి.