ఎమ్మెల్యే రోజా గ్రాఫ్‌.. పైకెగిసి.. పాతాళానికి పడిపోయే.!

కరోనా వైరస్‌ నేపథ్యంలో ఆంధ్రప్రదేశ్‌లోని అధికార పార్టీకి సంబంధించినంతవరకు అత్యంత యాక్టివ్‌గా వ్యవహరించిన ప్రజా ప్రతినిథుల్లో నగిరి ఎమ్మెల్యే రోజా గురించి ప్రముఖంగా చెప్పుకోవాలి. నియోజకవర్గంలోని చాలా ప్రాంతాల్లో ఆమె పర్యటించారు. కరోనా వైరస్‌ పట్ల అప్రమత్తంగా వుండాలంటూ ప్రజల్ని ఎడ్యుకేట్‌ చేశారు. ఈ క్రమంలో మాస్క్‌లు అందజేశారు.. అంతే కాదు, అనేక సేవా కార్యక్రమాలు పార్టీ తరఫున, వ్యక్తిగతంగా కూడా చేపట్టారు.

రోజా అలా కష్టపడ్తోంటే, నగిరి ప్రజానీకం ఆమెను చూసి ఆశ్చర్యపోయారు. రాష్ట్రంలో ఏ నియోజకవర్గంలోనూ లేనంత యాక్టివ్‌గా తమ ఎమ్మెల్యే వున్నందుకు నగిరి ప్రజానీకం మురిసిపోయారన్నది నిర్వివాదాంశం. కానీ, ఒకే ఒక్క సంఘటనతో అనూహ్యంగా రోజా గ్రాఫ్‌ పడిపోయింది. అవును, పైకెగిసినట్టే ఎగిసిన రోజా ఇమేజ్‌.. తన నియోజకవర్గంలో ఓ బోరుని ప్రారంభించే క్రమంలో చేసిన ఓవరాక్షన్‌ దెబ్బకి పాతాళానికి పడిపోయిందనడం అతిశయోక్తి కాదేమో. నిజానికి, ప్రభుత్వంపై విమర్శలు చేసిన ఓ అధికారి, తమ ఎమ్మెల్యే అందిస్తున్న సహకారాన్ని ప్రశంసించారంటే.. రోజా అక్కడ ఎంత యాక్టివ్‌గా పనిచేశారో అర్థం చేసుకోవచ్చు.

మరి, రోజా ఎందుకిలా చేశారు.? మహారాణిలా తాను నడిచి వస్తుంటే, తన కోసం జనం రోడ్డుకి ఇరువైపులా నిల్చుని పూలు జల్లే కార్యక్రమాన్ని ఎందుకు ప్రోత్సహించారు.? ఇదే ఇప్పుడు ఎవరికీ అర్థం కాని ప్రశ్న. తనపై విమర్శలు రావడంతో తొలుత రోజా ఆగ్రహావేశాలతో ఊగిపోయారుగానీ.. ఆమెకీ తెలుసు, ఆమె చేసిన తప్పేంటో. గ్రౌండ్‌ రియాల్టీ ఆ తర్వాత ఎలా మారిందో.. పార్టీ శ్రేణులే ఆమెకు విన్నవిస్తున్నారట. దాంతో, చేసిన తప్పుకి పశ్చాత్తాపపడటం మినహా ఆమె చేయగలిగిందేమీ లేదు.

నిజానికి కోట్లు ఖర్చు చేసినా రాని పబ్లిసిటీ, నియోజకవర్గంలో కలియతిరుగుతూ, ఆత్మీయంగా అందర్నీ పలకరించడంలో రోజా సంపాదించుకున్నారు అంతకు ముందు వరకూ. ఒకే ఒక్క ఘటనతో ఇప్పుడు నగిరిలో రోజా గ్రాఫ్‌ అమాంతం పడిపోయింది.