వైసీపీ ప్రజా ప్రతినిథులకి ‘బాధ్యత’ లేదా.?

ఓ మంత్రిగారేమో కరోనా కోసం ప్రత్యేకంగా ఏర్పాటు చేసిన ఐసోలేషన్‌ వార్డు ప్రారంభోత్సవానికి వెళతారు. ఇంకో మంత్రిగారేమో.. పెద్ద సంఖ్యలో అనుచరుల్ని పోగేసుకుని, ప్రజలకు సాయం చేస్తున్న పేరుతో పబ్లిసిటీ స్టంట్లు చేసుకుంటారు. అసలేం జరుగుతోంది ఆంధ్రప్రదేశ్‌లో.? ప్రారంభోత్సవాలు చేసుకునే సమయమా.? అన్న కనీస ఇంగితం లేని వ్యక్తి మంత్రిగా వుండడం రాష్ట్ర ప్రజల దుస్థితిని చెప్పకనే చెబుతోంది.

పైగా, సదరు మంత్రిగారు రిబ్బన్‌ కటింగ్‌ చేస్తోంటే, కత్తెర పదును లేక.. రిబ్బర్‌ మొరాయించడం.. సదరు మంత్రిగారు ఫొటోలకు పోజులిచ్చే క్రమంలో మొహానికి వేసుకున్న మాస్క్‌ని కిందకి జార్చేయడం.. ఇవన్నీ ఇప్పుడు అధికార పార్టీపై విమర్శలకు కారణమవుతున్నాయి.

ప్రభుత్వం లక్షలు ఖర్చు చేసి మరీ ప్రకటనలు గుప్పిస్తోంది.. సోషల్‌ డిస్టెన్స్‌ పాటించాలనీ.. మాస్క్‌లు వినియోగించాలనీ. తెలంగాణలో ఈ పరిస్థితి లేదు. ఆ మాటకొస్తే, దేశంలో ఎక్కడా ఏ ప్రజా ప్రతినిదీ¸ ఈ స్థాయిలో ఓవరాక్షన్‌ చేయడంలేదు. ఆంధ్రప్రదేశ్‌కి మాత్రమే పరిమితమయ్యింది ఈ ఓవరాక్షన్‌. మాస్క్‌ల మీద అధికార పార్టీ రంగుల్ని ప్రింట్‌ చేయడం, ప్రభుత్వ ఖజానా నుంచి పేదల కోసం ఇస్తోన్న వెయ్యి రూపాయలతో ‘వాయిదా పడ్డ’ స్థానిక ఎన్నికల కోసం ప్రచారం చేయడం.. ఇవన్నీ అధికార పార్టీ భావదారిద్య్రాన్ని చెప్పకనే చెబుతున్నాయి.

కొందరు మంత్రులు మీడియా ముందుకొస్తున్నారు.. రాజకీయ విమర్శలతో విరుచుకుపడిపోతున్నారు. తెలంగాణలో ఆ పరిస్థితిని చూస్తున్నామా.? దేశంలో ఇంకెక్కడైనా ఇలాంటి పరిస్థితిని చూస్తున్నామా.? ఆంధ్రప్రదేశ్‌ రాజకీయాల్లోనే ఎందుకీ ‘అతి’ కన్పిస్తోంది.? అధికార పార్టీ నేతలు చేస్తున్న ‘అతి’, కరోనా వైరస్‌ వ్యాప్తికి కారణమైతే ఏంటి పరిస్థితి.? ఇదీ ఇప్పుడు రాష్ట్రంలో సగటు ప్రజానీకం ఆవేదన.

ముఖ్యమంత్రి ఈ విషయమై ఎందుకు చర్యలు తీసుకోవడంలేదు.? అన్న ప్రశ్నకి, అధికార పార్టీ నేతలపై పార్టీ అధినేతకే ‘పట్టు’ లేదనుకోవాలా.? ముఖ్యమంత్రి, మంత్రుల్ని నియంత్రించే పరిస్థితుల్లో లేరని అర్థం చేసుకోవాలా.? అని విపక్షాలతో పాటు జనం కూడా ప్రశ్నిస్తున్న పరిస్థితి.