ఎమ్మెల్సీ కారులో డెడ్ బాడీ.! ఆ వైసీపీ నేత ఎక్కడ.?

ఎమ్మెల్సీ కారులో.. సదరు ఎమ్మెల్సీ మాజీ డ్రైవర్ మృతదేహం.! ఆంధ్రప్రదేశ్ రాజకీయాల్లో ఇదొక వింత. ‘నా భర్తని తీసుకెళ్ళి చంపేసి, శవంగా తీసుకొచ్చి మా ఇంటి ముందు పడేశారు..’ అంటూ మృతుడి భార్య రోదిస్తోంది. ‘అబ్బే, రోడ్డు ప్రమాదంలో చనిపోతే, మానవీయ కోణంలో మృతదేహాన్ని తీసుకొచ్చాం..’ అని ఎమ్మెల్సీ తరఫున కట్టుకథ అత్యద్భుతంగా తెరపైకి తెచ్చేశారు.

ఆంధ్రప్రదేశ్‌లో ఇంతే. గుండె పోటు వచ్చి, బాత్రూమ్‌కి వెళ్ళి.. అక్కడ నెత్తుటి వాంతులు చేసేసుకుని, గొడ్డలితో తల నరుక్కుని వైఎస్ వివేకానందరెడ్డి ఎలా చనిపోయారో.. దీనికోసం వైసీపీ అల్లిన కట్టు కథ ఏంటో అందరికీ తెలిసిన వైనమే. ఆ తానులోని గుడ్డ పీలికే.. అన్నట్టు, ఇదిగో ఇక్కడ వైసీపీ ఎమ్మెల్సీ కూడా అలాంటి కట్టుకథే అల్లినట్టున్నారు.

బాధిత కుటుంబానికి విపక్షాల నుంచీ, ప్రజా సంఘాల నుంచీ మద్దతు పెరగడంతో, చేసేది లేక పోలీసులు.. ఎఫ్‌ఐఆర్‌లో వైసీపీ ఎమ్మెల్సీ పేరు కూడా చేర్చారు. ఎమ్మెల్సీ అనంతబాబు మాత్రం విందు, వినోదాలతో ఎంజాయ్ చేస్తున్నారు. వివాహ వేడుకలతో సంబరాల్లో మునిగి తేలుతున్నారు. మరి, పోలీసులు ఆయన్నెందుకు అరెస్టు చేయడంలేదు.?

ప్రత్యేక బృందాలు ఏర్పాటు చేశారట.. ఆయన కోసం వెతుకుతున్నారట. అదేంటీ, ఎమ్మెల్సీ అంటే ఆయనకు భద్రత వుంటుంది కదా.? తద్వారా ఆయన ఆచూకీ తెలుసుకోవడం రెండు నిమిషాల పనే కదా.? అంటే, అదంతే.. ఆంధ్రప్రదేశ్‌లో అంతా అలాగే వుంటుంది.

పదో తరగతి ప్రశ్నా పత్రాల లీకేజీ స్కామ్.. అంటూ మాజీ మంత్రి నారాయణను హైద్రాబాద్‌లో అరెస్టు చేసి, చిత్తూరుకి తరలించి.. బలహీనమైన సెక్షన్లు పెట్టిన ఏపీ పోలీసులకి, వైసీపీ ఎమ్మెల్సీని పట్టుకోవడం చాలా చాలా కష్టమే మరి.! అధికార పార్టీ ఎమ్మెల్సీ కదా, ఆ మాత్రం జాప్యం చేసి, సదరు ఎమ్మెల్సీ తప్పించుకోవడానికి (బెయిల్ కోసం చేసే ప్రయత్నాలకు పరిస్థితులు అనుకూలించేలా చేయడం..) పోలీసులు అవకాశమిస్తున్నారన్నది విపక్షాల ఆరోపణ.