కరోనా ఎఫెక్ట్‌: ప్రపంచం చాలా చాలా మారిపోవాల్సిందే.!

‘ఇకపై ఏదీ ఇంతకు ముందులా వుండదు..’ ఇదీ నిపుణులు చెబుతున్న మాట కరోనా వైరస్‌ గురించి. ప్రపంచం చాలా మారాలి. చాలా చాలా మార్పులు చోటు చేసుకోవాలి. అయితే, అవన్నీ మనుషుల అలవాట్ల పరంగానే. అవును, కరోనా వైరస్‌ తీవ్రత తగ్గిపోయినా, మనుషులు తమను తాము చాలా మార్చుకోవాల్సి వుంటుంది. ఏమో, ఇకపై పబ్లిక్‌గా.. గుంపులుగా తిరగడం కుదరకపోవచ్చేమో. కరోనా వైరస్‌ కాకపోతే, మరో కొత్త వైరస్‌.. ఎప్పటికప్పుడు మానవాళికి సవాల్‌ విసురుతూనే వుంటుంది.

నిన్నటిదాకా ఒక లెక్క.. ఇకపై ఇంకో లెక్క. షాపింగ్‌ మాల్స్‌ కావొచ్చు, సినిమా ది¸యేటర్లు కావొచ్చు.. ఇతరత్రా ఎంటర్‌టైన్‌మెంట్‌ కేంద్రాలు కావొచ్చు.. భవిష్యత్తులో ఎలా మనుగడ సాధిస్తాయన్నది ప్రస్తుతానికి మిలియన్‌ డాలర్ల ప్రశ్నేనట. ‘చరిత్రలో చాలా వైరస్‌లని చూశాం..’ అని కొంతమంది లైట్‌ తీసుకోవచ్చుగాక. కానీ, ప్రపంచం ఎప్పుడూ ఇలా స్తంభించిపోలేదు. ఇది ఓ హెచ్చరిక. ఆషామాషీ హెచ్చరిక కాదు, కనీ వినీ ఎరుగని హెచ్చరిక. ఈ హెచ్చరిక తాలూకు తీవ్రత అనూహ్యంగానే వుంది. ప్రపంచ దేశాలు విలవిల్లాడుతున్నాయి కరోనా వైరస్‌ దెబ్బకి.

ఈ నష్టం ఏపాటిదో ఇప్పటికే అనుభవించేస్తున్నాం. దాదాపు లక్ష మంది కరోనా వైరస్‌కి బలైపోయిన పరిస్థితి కళ్ళ ముందు కనిపిస్తోంది. ఇంకా ఈ మహమ్మారి ఇంకెంతమందిని బలి తీసుకుంటుందో అంచనా వేయడం కష్టం. ‘లాక్‌ డౌన్‌’ తప్ప వేరే మందు లేదు కరోనా వైరస్‌కి. కొన్నాళ్ళకి కరోనా వైరస్‌కి విరుగుడుగా ‘వ్యాక్సిన్‌’ రావొచ్చుగాక. కానీ, వ్యాక్సిన్‌ ప్రపంచంలో అందరూ తీసుకోలేరుగా.! తీసుకున్నా, ఇంకో కొత్త వైరస్‌ వస్తే ఏంటి పరిస్థితి. సోషల్‌ డిస్టెన్సింగ్‌ ఒక్కటే మార్గం ఇలాంటి వైరస్‌లకి. కానీ, ఎన్నాళ్ళిలా.? ఎన్నేళ్ళయినా తప్పదనే చర్చ సర్వత్రా జరుగుతోంది. ఆ దుస్థితి రాకూడని ఆశిద్దాం.

అయితే, ముందే చెప్పుకున్నట్లు మనిషి మారాల్సిందే. ఆహారపుటలవాట్ల దగ్గర్నుంచి, జీవన శౖలిలో అనేక మార్పులు చేసుకుంటే.. వైరస్‌లను ఎదుర్కొనే సమర్థత పెరుగుతుంది. మందులతో కాదు, ముందుగా మన శరీరంలోనే ఇమ్యూనిటీ పెంచుకోవాలి. అలా చేయడం వల్ల కొంత మేర వైరస్‌లకు ధీటుగా మనం నిలబడగలం.