వరల్డ్‌ కప్‌ ఎఫెక్ట్‌: ధోనీతోపాటు, కోహ్లీపైనా వేటు.?

టీమిండియా వరల్డ్‌ కప్‌ని చేజార్చుకోవడం వెనుక నేరం ఎవరిది.? అంటే, ముందుగా వికెట్‌ కీపర్‌ మహేంద్ర సింగ్‌ దోనీ పేరునే సూచిస్తున్నారు చాలామంది. ఆ తర్వాతి పేరు ఖచ్చితంగా కెప్టెన్‌ విరాట్‌ కోహ్లీదేనన్నది మెజార్టీ అభిప్రాయం. మూడో నిందితులుగా సెలక్టర్లను ఇక్కడ ప్రస్తావించాలి. బీసీసీఐ తప్పిదాన్నీ కాదనలేమిక్కడ. చేతికి అందివచ్చిన ప్రపంచ కప్‌ని చేజార్చుకోవడమంటే అది అత్యంత బాధాకరమైన విషయం. టీమ్‌ పెర్ఫామెన్స్‌ సరిగ్గా లేక, కప్పుకి దూరమైతే అది వేరే విషయం. ‘పోరాడాం, ఓడిపోయాం..’ అంటే, అది మరో రకం.

కానీ, చేవ వుండి.. చేతకాక ప్రపంచ కప్‌ని టీమిండియా వదిలేసుకుంది. కాదు కాదు, ప్రత్యర్థి చేతిలో ప్రపంచ కప్‌ని పెట్టి, నిస్సిగ్గుగా టీమిండియా తిరిగొచ్చిందని భారత క్రికెట్‌ అభిమానుల్లో ఓ వర్గం బలంగా భావిస్తోంది. మాజీ క్రికెటర్లూ ఇదే విషయాన్ని కుండబద్దలుగొట్టేస్తున్నారు. క్రికెటర్‌గా మహేంద్ర సింగ్‌ ధోనీ, భారత క్రికెట్‌లోనే కాదు, ప్రపంచ క్రికెట్‌లోనే ఓ అద్భుతం. విరాట్‌ కోహ్లీ ప్రతిభ గురించి ఎంత చెప్పుకున్నా తక్కువే. కానీ, ప్రతిభ వేరు.. అవసరమైన సందర్భంలో సమయోచితంగా వ్యవహరించి, జట్టుని విజయ పథాన నడపడం వేరు.

గెలుపోటముల సమస్య కాదిక్కడ. పాకిస్తాన్‌కి ఛాంపియన్స్‌ ట్రోఫీని టీమిండియానే అప్పగించి వచ్చేసింది. అప్పట్లో కోచ్‌ కుంబ్లేతో వివాదాల కారణంగా కెప్టెన్‌ కోహ్లీ ప్రదర్శించిన పైత్యం తాలూకు ప్రతిఫలమది. ఇక్కడ, బ్యాటింగ్‌ లైనప్‌లో నాలుగో పొజిషన్‌ విషయమై కెప్టెన్‌ కోహ్లీ, సెలక్టర్ల అత్యుత్సాహం, అవసరం లేని ప్రయోగాలు తెచ్చిన ముప్పు కారణంగానే టీమిండియా వరల్డ్‌ కప్‌ని కోల్పోయిందన్నది నిర్వివాదాంశం.

ప్రపంచ క్రికెట్‌లోనే బెస్ట్‌ మ్యాచ్‌ ఫినిషర్‌ అన్పించుకున్న ధోనీ, ఈ వరల్డ్‌ కప్‌లో చేసిన పరుగులు, అందుకోసం అతను వాడుకున్న బంతుల్ని పరిశీలిస్తే, ఎక్కడో ధోనీలో అసంతృప్తి కన్పించకమానదు. ఆ అసంతృప్తి కారణంగానే, అతని ఆటతీరు అంతలా మందగించేసింది. జట్టు ప్రయోజనాల్ని కాదని, ధోనీ ‘జిడ్డు’ ఆట ఆడాడన్నది మెజార్టీ అభిప్రాయం. ఇలా సవాలక్ష విశ్లేషణల నేపథ్యంలో వన్డేల నుంచి కోహ్లీని కెప్టెన్‌గా తొలగించాలనే ఆలోచన చేస్తోంది బీసీసీఐ.

గౌరవప్రదంగా ధోనీ కూడా క్రికెట్‌కి గుడ్‌ బై చెబితే మంచిదని ఆల్రెడీ బీసీసీఐ నుంచి, మహేంద్ర సింగ్‌ ధోనీకి సమాచారం కూడా అందిందట. పరోక్షంగా ఇది ఈ ఇద్దరు మేటి క్రికెటర్లపైనా ‘వేటు’ అనే భావించాల్సి వుంటుంది.