అమరావతి రైతుల పాదయాత్రపై వైసీపీ ఉక్కుపాదం: ఉత్తరాంధ్ర వరకూ వెళ్ళదా.?

అమరావతి రైతుల పాదయాత్రపై వైఎస్సార్ కాంగ్రెస్ పార్టీ ఉక్కు పాదం మోపనుందా.? అటు ప్రభుత్వం తరఫున, ఇటు పార్టీ తరఫున ఆటంకాలు సృష్టించేందుకు వ్యూహాలు సిద్ధమవుతున్నాయా.? ప్రభుత్వం తరఫున, పార్టీ తరఫున నానా రకాల ప్రయత్నాలూ ఈ మేరకు ఇప్పటికే జరిగాయి.. అవన్నీ విఫలమయ్యాయి. కానీ, ఇకపై మరింత వ్యూహాత్మకంగా వైసీపీ, వైసీపీ సర్కారు వ్యవహరించబోతున్నాయట.

ప్రభుత్వ సలహాదారు, వైసీపీ ముఖ్య నేతల్లో ఒకరైన సజ్జల రామకృష్ణారెడ్డి, అమరావతి రైతుల పాదయాత్ర విషయమై.. ఉమ్మడి తూర్పుగోదావరి జిల్లా అలాగే విశాఖ, శ్రీకాకుళం, విజయనగరం జిల్లాల నేతలతో తాజాగా మంతనాలు జరిపినట్లు తెలుస్తోంది. ఈ మంతనాల ఉద్దేశ్యం, అమరావతి రైతుల పాదయాత్రను అడ్డుకోవడమే.

ఎక్కడికక్కడ ఎమ్మెల్యేలు, ఎమ్మెల్సీలు, ఎంపీలు.. తమ తమ నియోజకవర్గాల్లోని ప్రజల్ని మూడు రాజధానుల విషయమై చైతన్యవంతుల్ని చేసి, ఏకైక రాజధాని అమరావతి.. అంటున్నవారికి వ్యతిరేకంగా నినదించేలా చేయాలన్నది వైసీపీ వ్యూహంగా కనిపిస్తోంది. ఇదే కోణంలో సజ్జల రామకృష్ణారెడ్డి, ఆయా వైసీపీ నేతలకు క్లాస్ తీసుకున్నారట.

ప్రస్తుతానికైతే, వైసీపీ కుట్రలేవీ అమరావతి రైతుల పాదయాత్ర ముందు సఫలమవడంలేదు. అమరావతిలో ప్రారంభమైన రైతుల పాదయాత్రకు అడుగడుగునా ఆటంకాలు ఎదురవడమే కాదు, ‘చంపేస్తాం..’ అంటూ ఫ్లెక్సీలు కూడా వైసీపీ మద్దతుదారులు ఏర్పాటు చేసి హెచ్చరికలు జారీ చేసిన సందర్భాల్ని చూశాం. గుడివాడ నియోజకవర్గ పరిధిలో ఈ సంఘటన చోటు చేసుకుంది.

అయినాగానీ, రైతుల పాదయాత్ర కొనసాగింది. రైతులకు ప్రజలు స్వచ్ఛందంగా ఘన స్వాగతం పలుకుతున్నారు. నిజానికి, రైతులకు అవసరమైన ఏర్పాట్లు కొంత మేర స్థానిక ప్రజానీకమే చేస్తున్నారు. అమరావతి అంటే, అది ఆంధ్రప్రదేశ్ రాజధాని అనీ, రాజధానికి భూములు ఇవ్వడమంటే, అది రాష్ట్రానికి ఇవ్వడమేనన్న కాస్త సోయ కూడా అధికార పక్షానికి లేకపోవడంతోనే ఆ పార్టీలో ఇంతటి వ్యతిరేకత కనిపిస్తోంది.

ఉత్తరాంధ్రలోని అరసవెల్లి వరకూ పాదయాత్ర జరగనుండగా, విశాఖ వరకూ కూడా ఈ పాదయాత్ర చేరుకోకుండా చేయాలన్నది వైసీపీ వ్యూహమట. అందుకు తగ్గట్టుగానే వైసీపీ వ్యూహరచన చేస్తున్నాగానీ, న్యాయ వ్యవస్థపైనా, దేవుడిపైనా, రాష్ట్రంపైనా తమకు విశ్వాసం వుందని రైతులు చెబుతున్నారు.